SUPP patut ngambu TERAS nyadi kaling
Ukai ngaga TERAS baka munsuh: Rayong
KUCHING: Parti Seati Rayat Sarawak (SUPP) patut ngetu bejaku senentang agih kerusi laban nya nadai meri reti enti pengujung iya ila sida lenyau semua kerusi.
Kaban Kunsil Nengeri (ADUN) Engkilili Dr Johnical Rayong Ngipa, ti udah ninggalka parti nya bulan seiti ke udah lalu masuk Parti Tenaga Rakyat Sarawak (TERAS), madah ketuai SUPP patut ngaku parti sida nadai ulih diguna agi lalu nyema sida majak liat penemu sereta enggai mendingka lalau ari ketuai Barisan Nasional (BN), utai nya ila nyangka deka ngujungka parti sida pulai gegendai mai jari puang maya pengawa bepilih besai nengeri ke-11 ila.
“Maya pengawa bepilih besai nengeri ke pemadu dudi, SUPP menang enam kerusi, tang lebuh beratika nama utai ke nyadi sekumbang dua tu, parti nya ulih dikumbai ngembuan nasib ke manah enti iya ulih ngetanka penuduk Simanggang.
“Taja pia (ngetanka penuduk Simanggang) bedau tejamin seagi chalun nya datai ari SUPP.”
Rayong madah, pekara ke sebaka mega tau nyadi ba Senadin, ke dipegai Menteri Muda Pengawa Lumba Datuk Lee Kim Shin.
Utai ke sinu, ku iya ketuai SUPP enggai nerima pekara ke nyengala, iya nya rayat nadai agi nyukung parti sida, lalu nya meh ti ngujungka parti pemadu tuai ba nengeri tu nyau tejelepi.
Ba pengawa pepilih besai nengeri ke-10 taun 2011, SUPP menang ba Senadin, Simanggang, Opar, Bengoh, Bawang Assan enggau Engkilili.
Tang kena 15 Mei tu tadi, bala pengari rayat ari SUPP ba Bengoh (Datuk Dr Jerip Susil), Bawang Assan (Dato Sri Wong Soon Koh), Opar (Ranum Mina) enggau Engkilili (Rayong) ninggalka parti nya lalu tama parti baru iya nya TERAS.
Pengari rayat ungkup kunsil nengeri SUPP diatu, semina Lee enggau Datuk Francis Harden Hollis (Simanggang).
Berindik ari pemansang politik ke pemadu baru diatu, SUPP suah amat madahka diri enda nyerahka 19 kerusi DUN ungkup sida ke ngelama tu ngagai TERAS.
Kelimpah ari nya mega, sida (SUPP) bisi mantah peminta TERAS tama BN.
Rayong ngumbai perangai ketuai SUPP semina ngemeratka diri empu aja laban sida sanggup agi meda BN lenyau kerusi ari ngemendarka parti tauka chalun ke beberita ngetanka kerusi sida.
“
Enti amat SUPP ngembuan semangat BN ke tulen, sida patut ngemendarka parti bukai ke bisi peluang menang besai bediri ngarika BN ungkup kerusi sida. Dr Johnical Rayong Ngipa
” ADUN Engkilili
“Enti amat SUPP ngembuan semangat BN ke tulen, sida patut ngemendarka parti bukai ke bisi peluang menang besai bediri ngarika BN ungkup kerusi sida.
“Nama utai ke patut digaga ketuai sida, iya nya meri sukung penuh ngagai ni-ni parti ke dichiri BN,” ku iya.
Rayong madah, SUPP enda patut ngaga TERAS baka munsuh tang ngambu nyadi kaling nyema sida amat-amat deka meda BN menang besai ba pengawa bepilih besai nengeri ke-11.
“Uji terima utai ke nyengala nyadi iya nya pengundi ba kandang mengeri udah leju enggau SUPP lalu sida sigi enda ulih ngerampas baru kerusi ke udah dipegai penyakal.
“Pekara bukai ke enda manah majak nyadi nyema parti nya ngasaika TERAS baka munsuh.
“Pekara tu patut diperundingka bala ketuai SUPP lalu badu beperanggai kelalu liat penemu laban nanggika pengujung iya ila sida lenyau semua utai.”