Bomba tejanggal ngerara api ketegal penengik orang ke bempu rumah
SARIKEI: Penengik seiku orang ke ngempu sebuah rumah pekereja ti enggai mending sereta nitihka gerah raban bomba ke benung bebendar ngerara api sebengkah rumah pekereja iya ke angus lemai ensana ngujungka raban bomba ribat bejalaika pengawa sida.
Ketuai Balai Bomba enggau Penyelamat Sarikei, Penulung Pemesai Bomba (PPgB), Suna Kaha madah, pekara nya nyadi maya orang ke ngempu rumah nya nitihka penemu diri empu sereta nadai kiruhka gerah raban bomba.
“Maya raban bomba benung bebendar ngerara api, orang ke ngempu rumah nya terus ngeruntuhka rumah pekereja nya ngena piko. Ulah orang ke ngempu rumah nya nugungka kayu rumah nya ba seiti palan ngujungka api mau baru sereta enda ulih dirara.
“Raban bomba udah nguji ngelalau orang ke bempu rumah nya, tang iya enda mendingka jaku raban bomba, lalu neruska pengawa diri ngeruntuhka rumah nya,” ku Suna, lebuh dirandau media kemari.
Suna madah munyi nya lebuh meri penemu bekaul enggau sebengkah penusah angus ke nyadi ba Jalai Sun Sun, Jakar, Sarikei, lemai ensana. Penusah nya dijangkaka nyadi urung pukul 5.10 lemai. Suna madah, rumah pekereja dua tingkat nya digaga ari kayu lalu alai tiga iku pekereja diau.
Kelimpah alai bala pekereja diau, ringkat baruh rumah nyadi bilik stor endur nyimpan barang, ku Suna.
“Raban kami bisi nerima kangau ari orang periman bekaul enggau penusah nya urung pukul 5.12 lemai. Maya kami datai ba palan penusah nyadi, gaya rumah ke udah angus sigi udah manggai 95 peratus.
“Kelimpah betapi enggau penanggul sereta penengik orang ke bempu rumah nya, raba bomba mega betapi enggau penanggul ngulihka bekal ai.
“Kebuah pua laban nadai pala paip enggau penatai ai baka pegung enggau sungai ngerimbai rumah nya. Raban kami tepasa ngambi ai ari pasar Jakar ke bepalan lebih kurang 1.5 kilometer ari palan penusah nya,”ku Suna.
Operasi nya betuaika Pemesai Bomba, Shairulnizam Waillie lalu dibantu Pemesai Bomba Kanan I, Salim Hussien. Berebak enggau nya, sebuah kereban pengangkut bomba enggau lima iku staf bisi enggau besaup ngerara api ba penusah nya.
Berebak enggau nya, seiku pekereja peranak menua Indonesia ke diau ba rumah nya maya dirandau ke madahka diri benama Darong madah, maya penusah nyadi iya enggau dua iku agi kaban iya benung gawa ba luar rumah nya.
“Maya kami benung ngereja pengawa, enda mukai-mukai akmi tedinggaka panjung nyawa bos kami (pengempu rumah) madahka rumah angus.
“Lebuh kami malik ngagai rumah kami nya, dia kami meda asap mayuh pansut ari dalam rumah kami. Meda utai ke bansa nya, aku enggau dua agi kaban aku nya berumban tama ke dalam rumah nguji ngambi keresa.
“Taja baka nya, enda mayuh keresa ulih japai laban api chukup jampat nyerarai nganguska rumah,”ku Darong. Kebuah penusah enggau penyampau pengerugi ke nuntung mansa agi benung dipansik.
Penusah nya mujur dirara ambis urung pukul 5.27 lemai. Nadai nyawa diripotka bebadi tauka bakal ketegal penusah nya.