Riot udah sedia nyadi presiden, ngiring SUPP

KUCHING: Sapit Presiden Parti Seati Rayat Sarawak (SUPP), Datuk Seri Richard Riot Jaem enda nulak pelaba penemu ti ngasaika orang ukai China mangku pengawa nyadi presiden parti nya ila.

Enti menua Amerika Syarikat udah milih presiden kulit chelum keterubah baka Barack Obama nyadi, nadai kebuah enti ditu ila presiden ukai China megai SUPP.

“Nadai sapa nyangka presiden Amerika Syarikat datai ari orang ke bekulit chelum sebedau taun 2008 tang meh utai ke nyadi.

“Nya alai, bisi kebuah SUPP diarika presiden ukai China maya pengawa bepilih ungkup parti kena bulan Ogos tu.” ku iya lebuh dirandau beserimbai enggau program kem ‘I Want Sihat’ ba Sekula Sunny Hill ditu kemari.

Riot madah, SUPP endang parti diarika mayuh pupu raban bansa lalu 82 peratus kaban sida endang orang China.

Tang ku iya, tebal agi kaban nya bisi pengandal ngagai iya ulih ngiring parti lalu rinduka iya (Riot) nyadi presiden.

“Aku ukai diri sebaka enggau Presiden Barack Obama. Iya endang orang ke bekulit chelum lalu enda kala ngelama tu kita nyangka presiden Amerika Syarikat datai ari orang ke bekulit chelum.

“Enti pekara nya tau nuadi nadai kebuah aku enda ulih mangku tanggung pengawa nya.

“Ditambah enggau peneleba 24 taun aku udah nyadi Kaban Parlimen, aku ngasaika diri udah besedia napi nama aja pemar ke diberi ngagai aku,” ku iya.

Riot ti mega nyadi Menteri Sumber Mensia enggau nyadi Kaban Parlimen Serian madah, aum besai tiga taun sekali (TDC) nya nyangka enda diatur dalam timpuh dua bulan tu.

“Pekara nya bedau diputuska agi laban Menteri Besai bisi pengawa ba menua luar maya haribulan nya.

“Naka ke ditemu aku, TDC diperambu kena 23 enggau 24 Ogos nyangka enda nyadi diatur maya haribulan nya.

“Tang iya tetap diatur dalam bulan Ogos sereta bisi seiti pekara bedau ditulis dalam surat,” ku iya.

Berebak enggau nya, kena 30 April tu tadi pengudah aum opis komiti besai (CWC) digaga, Presiden SUPP Tan Sri Peter Chin bisi nyebut Menteri Besai enggau Kepala Menteri deka dikanggau ngulu TDC nya.