Perintah nengeri dipinta mayar pampas, geran pindah enggau lengkas
KUCHING: Sapit Menteri Pengeraja Asal enggau Rampa Menua Datuk Seri Dr James Dawos minta perintah nengeri ngelengkas bayar pampas enggau geran mindah ngagai peranak ke kena bungkur projek Tekat Ai Bengoh.
Ku iya, atur nya ulih nyeliah operasyen tekat ai ari tejanggal panjai agi ke alai perintah nengeri patut mutar penanggul ke ditapi peranak menua nya dulu.
“Nuan enda ulih ngampuhka kandang endur tekat ai enti nuan enda mayar pampas sereta geran mindah ti tau ngujungka rayat ngelaban,” ku iya pengudah tembu aum begulai enggau Komiti Sekim Pengentap Pendiau Bengoh ( BRS) di opis iya ( Bt 10) kemari.
Dawos ke mega MP Mambong netapka operasyen Tekat Ai Bengoh chukup beguna dikena napi gaya ubah gaya hari.
Ubah gaya hari diatu kelebih agi maya kemarau panjai tau ngujungka pelilih Kuching kurang bekal ai beresi, pia ku iya.
“Nya meh kebuah palan Tekat Ai Bengoh chukup beguna. Tekat ai nya ulih mantu maya ikas ai ba Sungai Sarawak ( Kiri) majak langkang ketegal musin kemarau.
“Kitai patut ngelengkas operasyen. Aku ngasai udah kelalu lama, manggai lapan taun udah tang tekat ai nya lalu bedau bejalaika opersyen.
“Sebarang maya bereng- kah ari diatu, enti ikas ai ba Sungai Sarawak ( Kiri) langkang, orang ke diau ba pelilih Kuching deka betapi enggau penanggul suntuk bekal ai,” ku iya.
Dawos madah, enti perintah begunaka tanah NCR peranak menua nya, pampas ke setipak patut dibayar ngagai orang ti beempu tanah.
Tanah NCR ba luar kelingi tekat ai nya urung 4,000 hektar ke alai perintah begunaka urung RM64 juta kena mayar pampas nya.
Dawos nambah, rumah enggau tanah endur peranak menua nya berumah endang udah dibayar pampas lalu isu ke diatu iya nya senentang bayar pampas ungkup tanah NCR sida ti diperambu perintah ke deka diampuh enggau ai.
“Enti perintah enda mayar pampas, sida bisi hak enggai mindah laban tanah NCR nya endang tanah sida ke sah,” ku iya.
Kelimpah ari bayar pampas tanah, Dawos mega minta perintah ngelengkas bayar geran mindah baka ke udah dulu disemaya ngagai peranak menua nya.
Ku iya, perintah patut meri geran mindah RM10,000 ngagai tetiap ruang bilik ngambika bisi dikena sida mindahka semua perengka rumah ngagai BRS.
Dawos madah dua pinta nya entara sekeda resolusyen ke ditetap maya aum Komiti BRS kemari.
Iya madah resolusyen deka dianjung ngagai Menteri Pengeraja Asal enggau Rampa Menua Datuk Amar Awang Tengah Ali Hasan.
“Aku empu deka nganjung resolusyen nya ngagai menteri pengudah semua tembu,” ku iya.