JKKK diperansang ngemeratka pengelikun di rumah panjai

BINTANGOR: Komiti Pemansang enggau Pengelikun Genturung Pendiau ( JKKK) ba rumah panjai ditangkan anang sanggu minta jaku ajar ari Opis Penyah Penusah Enggau Pengerara Api ( Bomba) senentang chara ngintu pengelikun rumah panjai.

Pemesai Pelilih Mit Menua Meradong Mastapha Julaihi madah, agi mayuh rumah panjai ke lebih agi ba pelilih menua tu jauh ari Opis Bomba tauka empai datai jalai.

“Nya alai, JKKK ngembuan tanggungpengawa ke besai senentang ngintu pengelikun rumah panjai sida.

“Seiti ari chara iya nya, anang enggai datai ngelawa opis bomba minta ajar tauka pekara bukai ti bekaul sebedau ngajar bala bukai ba rumah panjai,” pia ku iya madah.

Iya mantaika jaku tu ba atur pengawa Sivik Mesra beserimbai enggau Pengawa Nyuaka Setipikit Ngagai Tuai Rumah Pelilih Mit Meradong ba sebengkah restoren di Bintangor ditu, kemari.

Pengawa nya dipenyadi Sapit Residen Sarikei ( pengawa rama) Lim Hock Meng ngarika Residen Sarikei Dahim Nadot lalu digulu Sekretari Opis Kunsil Meradong enggau Julau Adrian Luang, Pengulu Augutine Pau enggau bala ke bukai.

Kelimpah ari nya ku Mastapha, JKKK mega ngarika rumah panjai sida tau berundingka chara dikena ngulihka perengka pengerara api.

“Perengka tu beguna bendar maya bisi penusah angus nyadi ke lebih agi ngagai rumah panjai ke enda datai jalai tauka enda ulih dilawa bomba.

“Kita tau ngena duit JKKK tauka minta saup ari pengari rayat kita dikena meli perengka nya,” ku iya madah baru.

Ba pekara bukai, iya mega ngelalau JKKK ngambika chakah agi ngembing bala bukai ngangkatka penatai pemisi diri.

JKKK ku iya, bela megai tanggungpengawa ngembing rayat seririh enggau tuju perintah ti deka ngubah pengidup rayat ba menua pesisir.

“Perintah udah nengkebang mayuh macham bengkah program nyengkaum ba menua pesisir ti bisi bekaul enggau pengawa dikena ngangkatka tikas pengidup.

“Lalu JKKK megai tanggungpengawa mai bala bukai nimbal juluk ati perintah tu,” pia ku iya madah.

Berebak enggau nya mega Mastapha ngelalau Gerempung Tuai Rumah Pampang Meradong ( PTRM) ngatur program ti ulih dikena nempa penyerakup ba rayat di pelilih mit menua tu.

Ari nya, iya muji program ke diatur sehari nya ti udah ngempuruka bala tuai rumah enggau ejensi perintah sereta berandauka pekara dikena mutarka penanggul ke ditapi ba rumah panjai.

“Seiti ari batang tuju kitai ngatur program ti ngaul bala mayuh iya nya ngetanka penyerakup ke endang udah bisi kenyau menua tu Merdeka 57 taun ke udah.

“Penyerakup ukai muntang digaga laban begunaka timpuh ti panjai lalu kitai rebak maya tu patut ngetanka pekara nya nyentuk ke jemah ila,” ku iya madah baru.