Pangku pengawa nyadi Tuai Rumah laun dikemendar nangika rumah panjai pechah

BINTANGOR: Opis Residen Sarikei enda nyalam napi penanggul senentang pengawa nyiri orang nyadi tuai raban bansa nyengkaum tuai rumah ba pelilih tu.

Sapit Residen Sarikei (Pengawa Rama) Lim Hock Meng madah, seiti ari ke- buah penuduk nya lebih agi baka nyadi tuai rumah laun dikemendarka laban nangika rumah panjai tau pechah.

Kebuah pia ku iya, sesebengkah rumah panjai ulih pechah laban enda setujuka tuai rumah ke dipilih.

“Pekara tu kala nyadi ukai semina ba sesebengkah menua aja tang nyau deka semua rumah panjai di serata Sarawak.

“Nya alai, bala tuai rumah bisi laun nerima setipikit,” ku iya.

Iya mantaika jaku nya maya ngarika Residen Sarikei Dahim Nadot ba Sivik Mesra beserimbai enggau Pengawa Nyuaka Setipikit Tuai Rumah ba sebengkah restauran di Bintangor ditu, empai lama ke udah.

Bela bisi datai maya pengawa tu iya nya Pemesai Pelilih Menua Meradong Mastapha Julaihi, Sekretari Opis Kunsil Meradong enggau Julau Adrian Luang, Pengulu Augutine Pau enggau bala ke bukai.

Ba pengawa nya, bisi 67 iku tuai rumah pelilih Meradong nerima setipikit nandu pengawa nyadi tuai rumah nyengkaum dua iku nerima setipikit baru nyadi tuai rumah.

Nampung jaku iya baru, ku Lim, kelimpah ari nya pekara baka tu mega nyadi ba genturung pengen- tap pendiau di kandang mengeri.

Ku iya, ba kandang mengeri diuan macham pupu raban bansa nejuka penanggul deka nyiri sapa ke patut dipadu nyadi tuai tuai.

“Kitai enda nemu baikka deka nyiri tuai rumah, Ketua Kampung tauka kapitan.

“Semua tu ngujungka pengawa meri setipikit nyau laun,” ku tandu iya.

Nambahka nya, Lim mega madah, diatu tuai rumah nyengkaum bala peranak rumah panjai meseti nemu ubah baru senentang pengawa nyiri tuai rumah.

Ba ubah baru ku iya, menua tauka rumah panjai ke udah dientak kenyau ari 17 Februari 2000 ke atas, tuai rumah meseti megai 20 tauka lebih pintu.

“Pekara ke nyadi diatu iya nya bisi tuai rumah megai kurang ari pemanjai nya,” pia ku penerang iya.

Dulu suba ku Lim nerang, menua tauka rumah panjai ke udah bisi dientak ari 31 Ogos 1963, tuai rumah tau megai kurang ari 10 pintu lalu pekara nya diubah baru ari taun nya ngagai 17 Februari tuai rumah meseti megai lebih ari 10 pintu.

Ba pekara bukai, ba pelilih Meradong naka ke diatu bisi 101 iku tuai rumah, 19 iku kapitan enggau 12 iku ketuai kampung.