JKKK ngajar rayat ngatur pemansang
Sida JKKK patut diberi kus chara ngatur mayuh bengkah pengawa: Masir
SIMUNJAN: Penumbuh Komiti Pemansang enggau Pengelikun Genturung Pendiau (JKKK) ba genap kampung enggau rumah panjai di nengeri tu nyadika chara dikena ngajar rayat mayuh ngereja pengawa ngatika diri enggau ngatur pemansang.
Kaban Parlimen Sri Aman, Masir Kujat madah, komiti JKKK beguna amat nyadi pengatur pengawa ba peringkat baruh.
“Nya alai, sida ( ketuai) JKKK patut diberi kus (latih pengelandik) chara ngatur mayuh bengkah pengawa dikena ngemajuka komiti JKKK.
“Ketuai enggau pengatur pengawa ke landik ulih ngemajuka kampung enggau meruan. Kebuah pia laban sida komiti JKKK endang nyadika jematan penyambung rayat enggau perintah dalam ngaduka sebarang bantu enggau utai bukai ke bisi diberi ngagai sida,” ku iya.
Iya madah munyi nya rambau Pengerami Tuai Begulai Enggau Rayat ke diatur JKKK Rumah Ernnie, Kampung Senkujang, Simunjan ditu, kemari.
Nangkan ke nya, iya madah ketuai raban bansa diatu patut lebih nemu nama utai ke bisi nyadi ngelingi sida, tanggung pengawa sida, enggau utai ke bisi nyadi ba dunya luar ketegal pangka teknologi pemadah enggau penyambung. Ditu meh ketuai raban bansa patut nguna pengelandik ke bisi dikembuan sida dikena ngemansangka nembiak redak ke dijaga sida.
“
Ketuai enggau pengatur pengawa ke landik ulih ngemajuka kampung enggau meruan. Kebuah pia laban sida komiti JKKK endang nyadika jematan penyambung rayat enggau perintah dalam ngaduka sebarang bantu enggau
” utai bukai ke bisi diberi ngagai sida. Masir Kujat Kaban Parlimen Sri Aman
“Nya alai, ketuai raban bansa patut mandangka penemu ke sebaka enggau peneka nembiak redak lalu anang ngulihka penguntung ungkup diri empu aja.
Iya madah, pemansang ke udah dijapai nengeri tu diatu asil ari pengeransing bala ketuai ke endang pintar dipilih rayat empu.
“Nya alai, semua utai ke dipinta rayat endang patut diperati ngambika meri pengelantang ngagai sida,” ku iya.
Sama bisi datai Pemesai Pribit Masir, Edmund Pirang sereta kaban JKKK ke bukai.