Rayat Sri Aman berasai gaga meda ai paip udah deras

SRI AMAN: Rayat Sri Aman nyadaka pengaga ati meda peneras ai paip ngagai rumah sida taja pan Loji Ai Beresi Bayai di Empango ditu agi benung diuji.

Tebal agi sida ke diau ba kandang Jalai Brayun tekenyit meda peneras ai paip ba rumah sida lalu pekara nya mutarka penanggul ke udah lama nuntung sida ngelama tu.

Injinir Opis Kereja Raya ( JKR) Sri Aman, Cassidy Morris madah, naka ke diatu Loji Ai Beresi Bayai benung ba tikas diuji ngagai rayat ke diau ba Sri Aman ditu.

“Aku andal Loji Ai Beresi Bayai, di Empango, Sri Aman tu ulih mutarka penanggulai di Sri Aman enti nyema iya udah dibuka penuh ila.” ku iya.

Nangkan ke nya, Loji Ai Beresi Bayai di Empango udah dikemanahka baru enggau ungkus kira RM43 juta lalu ulih ngasilka ai beresi dalam kapisiti 33.3 Juta Liter Sehari ( MLD) bebanding enggau kapasiti ke suba semina 13.3 MLD aja.

Loji Ai Beresi Bayai di Empango tu deka ngemekalka ai ngagai lebih 10,000 orang ke nguan rumah ba Sri Aman enggau penyampau ai ke diguna sida diatu 22 MLD.

Kelimpag ari nya sebengkah Stesyen Peneras Ai beungkus RM380,000 mega udah digaga ba Simpang Jalai Hollis Tini dikena ngaduka gaya penguat ai nuju ngagai kandang Sri Jaya, Brayun enggau menua ke besemak.

Peminta ngasuh ngaga sebengkah Stesyen Peneras Ai ba puak pasar Sri Aman deka dianjung ngagai perintah ngambika penanggul enda kuat ai nyadi ba menua nya.