KM: Menua Sarawak likun
Taja pan diuan 30 bengkah pupu raban bansa tang penyarut pasal jalai pengarap nadai kala nyadi ditu
LUNDU: Petalat senentang pekara ke bekaul enggau batang pengarap ke suah nyadi di Semenanjung Malaysia patut enda dititih peranak nengeri tu.
Kepala Menteri Tan Sri Datuk Amar Adenan Satem madah rayat Sarawak ti bemacham pupu raban bansa patut ngenanka penyerakup ngambi tau nyadi chunto ke nengeri bukai.
Taja pan Sarawak diuan 30 macham pupu raban bansa, laya ba pekara ti bekaul enggau batang pengarap nadai kala nyadi ditu.
“Di Semenanjung Malaysia semina bisi tiga bansa ke pemadu besai iya nya Melayu, China enggau India, taja pia pedis sida deka ngenanka penyerakup.
“
Di Semenanjung Malaysia semina bisi tiga bansa ke pemadu besai iya nya Melayu, China enggau India, taja pia pedis
” sida deka ngenanka penyerakup. Kepala Menteri Sarawak Tan Sri Datuk Amar Adenan Satem
“Berindik enggau nya, kitai di Sarawak anang nitih ulah ke baka nya ti tau mulaika pengerugi,” ku iya.
Iya mansutka jaku tu ba pengerami Majlis Ramah Tamah Aidilfitri renggat Pelilih Lundu di Kompleks Lumba enggau Main Lundu kemari.
Iya nambah, rayat Sarawak nadai penanggul begulai ba mayuh macham pengawa ke dikereja ninting hari.
“Kitai ulih makai sereta ngirup kelimpah ti ngereja pengawa bukai begulai, semua nya nadai penanggul,” ku iya.
Ketegal nya, iya madah rayat Sarawak patut lantang diau di nengeri tu lalu anang sesekali ngeruga penglikun ke udah lama diasai.
Ba pengerami ke sama, Adenan ke mega Adun Tanjung Datu ngasaika Lundu sebengkah palan ke nyelai laban kandang endur nya udah ngangkatka iya nyadi Kepala Menteri.
“Enti ukai ketegal sukung ari peranak Lundu, engka aku enda nyadi Kepala Menteri.
“Berindik enggau nya, peranak Lundu patut temegah laban pengari sida seiku Kepala Menteri,” ku iya.
Pengawa nya kemari bela ngerami pengada bini Kepala Menteri Puan Sri Datuk Jamilah Anu.
Bela datai Sapit Menteri Dalam Menua Datuk Wan Junaidi Tuanku Jaafar ke mega MP Santubong.