PLKN Kumpulan 3 Siri 11 ngerejister 15,000 iku pelatih
KUCHING: Opis Latih ke Bansa ( JLKN) deka ngemerat pengawa munaska sarang nyamuk aedes dikena ngurang sereta nyeliahka penyakit denggi, ke mega sebengkah ari Program Servis Komuniti ungkup pelatih Kumpulan 3 Siri 11.
Ketuai Direktor JLKN, Datuk Abdul Hadi Awang Kechil madah, nya berindik ari menua betapi enggau penyakit denggi kelebih agi ba dua buah nengeri di Semenanjung Malaysia.
Iya madah, 81 buah kem Palan Latih Ke Bansa di Malaysia udah dipinta ngemeratka Program Servis Komuniti nya.
“Baka ti ditemu kitai beberapa buah menua betapi enggau penyakit denggi, kelebih agi ba dua buah nengeri iya nya Kelantan enggau Selangor.
“Berindik ari nya, kami minta semua 81 palan pematih di serata menua lebuh ngatur Program Servis Komuniti ngemeratka pekara tu, meresi kandang endur ti ditemu mayuh betapi enggau penyakit denggi.
“Kami udah minta komando berandau sereta bekerejasama enggau opis bekuasa nentuka kandang endur ke patut,” ku iya.
Hadi mansutka pekara tu ba aum enggau pengarang berita, pengudah bejadi sereta ngelepaska pejalai bas ti mai pelatih PLKN, ti diatur ba Dewan Suarah ditu, kemari.
Kelimpah ari nya, iya madahka raban pelatih mega deka dilatih tauka diajar ngembuan pengerindu,penyayau sereta taluk ke menua, ngambika pekara ti nyadi di menua tasik baka Palestin ulih diseliahka nyadi di menua tu.
“Raban nembiak enggau raban bansa patut ngembuan ulah ti sayau sereta taluk ke menua, kelimpah ngemeratka penaluk ba raban bansa,” ku iya.
Lebuh dipinta ngenang penyampau nembiak ti enggau PLKN Kumpulan 3 Siri 11, iya madah bisi 15,000 iku pelatih ti ngerejister diri ba 100 buah Palan Ngerejister diri sereta deka dianjung ngagai 81 buah kem PLKN serata Malaysia.
Iya madahka di Sarawak bisi 8 buah kem PLKN ti ngelatih urung 250 nyentuk ke 300 iku pelatih.
Ari Sarawak bisi 700 iku pelatih, taja pia ukai semua ulih datai ketegal nyambung pelajar, ku iya.
“Urung 20 peratus nembiak ari Sarawak dianjung ngagai kem PLKN di Semanjung Malaysia baka seharitu bisi dianjung ngagai Kem PLKN Jurga Selangor enggau Kem PLKN Princess Haliza enggau ke bukai.
“Lalu pia mega ari Semananjung urung 20 peratus nembiak dianjung ngagai Kem PLKN di Sarawak enggau Sabah,” ku iya.