PMSB ngadaka mayuh peranak menua tu kereja kapal
SIBU: Menua tu deka ngurangka penyampau nguna pekereja ari menua luar ba mayuh bengkah industri laban deka nyapai status nyapai menua maju, ku Kaban Kunsil Nengeri (ADUN) Nangka Dr Annuar Rapa’ee.
Iya madah, pangka pengawa ngambi pekara ari menua luar nyau ngeruga peluang peranak ari menua tu bulih pengawa kelimpah ngenataika mayuh penanggul bukai.
“Enti kelalu mayuh ngambi pekereja ari menua luar, tentu peluang peranak menua tu nyau nadai agi.
“Industri ke mayuh nguna pekereja ari menua luar iya nya sektor pengawa berumah, kilang-kilang enggau kapal-kapal.
“Enti deka nyadi menua maju ke ulih ngasilka puku ngagai ekonomi, kitai patut ngurangka pengawa ngambi pekereja ari menua luar lalu ngemeratka peranak ari menua tu empu,” ku iya.
Iya madah munyi nya rambau Pengerami Konvokesyen enggau Tembu Kus Latih Marin Palan Latih Maritim Pelita Maslaut (PMSB) Ke-24 ke diatur ba Dewan Suarah Sibu, empai lama ke udah.
Bela datai Ketuai Direktor Raban PMSB Masni Amit, Ketuai Direktor Jaya Coastal Sdn Bhd Datuk Albert Ling, Mandal Direktor Opis Yayasan Sarawak Yantiska Mahmud, Pemesai Opis Tasik Kandang Menua Tengah Opis Tasik Sarawak Noorazman Abdul Wahab enggau Superintenden Kru ari Kompeni Sealink Sdn Bhd Leonard Luhat.
Rambau pengerami nya, bisi 37 iku pelatih PMSB bulih setipikit ke disuaka Dr Annuar.
Nangkan ke nya, iya madah industri kapal ba menua tu agi betapi enggau penanggul kurang pekereja peranak menua. Kira 70 peratus pengawa nya dipangku pekereja ari menua luar ke gawa ba kapal Malaysia.
“Rikut Statistik meda semina 30 peratus aja peranak menua tu kereja kapal.
“Tang penyampau kami nguji ngubah nengah PMSB ke udah mujur ngadaka kira 1,200 iku orang gawa ke tasik peranak menua tu.
Iya madah, penumbuh Palan Latih Maritim PMSB di nengeri tu ulih ngadaka mayuh agi orang gawa ke tasik gawa ba kompeni kapal enggau ngurangka penyampau pekereja menua luar.
“Aku pechaya penyampau orang ti gawa ke tasik ari menua tu deka majak nambah dua tiga taun ke deka datai laban PMSB endang bebendar deka ngemansangka industri kereja ke tasik ba nengeri tu sereta ngurangka pengawa ngambika pekereja menua luar.
“Tambah mega, menua tu udah mayuh ngembuan kapla ke begunaka orang landik ari menua tu lalu PMSB sempama baka kilang ke ngadaja pekereja landik gawa ba tasik di nengeri tu.Aku mega pechaya penyampau 30 peratus nya ulih nambah manggai ngagai 60 ke 70 peratus udah tu ila,” ku iya.