Apai indai patut meransang anak rinduka bidang robotik
BINTULU: Apai indai patut meri peransang sereta sukung bekaul enggau penau ke bisi dipandangka bala anak sida ngagai bidang robotik sereta sains enggau teknologi.
Kaban Parlimen Bintulu, Datuk Seri Tiong King Sing madah, enti nadai sukung ari bala apai indai, penau enggau pengerindu bala anak sida ngagai bidang nya maya agi ba sekula primari nyangka tekubur naka nya aja.
Nangkan ke nya, iya madah sukung ari bala pengajar enggau piak sekula beguna amat dikena meransang runding sida (pelajar) lebih kreatif enggau inovatif. “Taja kitai nemu pengawa ngangkatka runding ti kreatif enggau bepenmu dalam bidang sains enggau teknologi amat pedis tang bala pengajar patut berunding positif terus meransang bala pelajar sida rinduka bidang tu ngambika meri penguntung ngagai sida dudi hari,” ku iya.
Iya madah munyi nya rambau nutup program Pekit Robotik Nasional Sekula Primari enggau Sekondari Tikas Nengeri Sarawak ba Dewan Suarah lemai kemari.
Tiong madah, robotik endang bidang ke ulih mantu mensia ba mayuh bengkah pengawa ke pedis dikereja ninting hari sereta ulih ngurang pemendar mensia ngereja pengawa.
Nya alai, ku iya bala pelajar patut ngerebut peluang dikena nambahka pengelandik sida dalam bidang nya awakka meri penguntung ngagai mensia mayuh dudi hari.
Iya madah, naka ke diatu bidang sains enggau teknologi patut dikemeranka perintah lalu perintah patut nyediaka agih belanja tambah dikena ngemansangka bidang tu.
Ku iya, lebuh beratika penau ke dikembuan bala nembiak ke bisi nyereta pekit robotik tu, iya madah bala pelajar nya ngembuan juluk deka nulung dunya jemah ila.
Berebak enggau nya, iya nesau bala pelajar ngambika berunding lebih kreatif, dikena nambahka pengelandik sida nyema deka meda pengawa ke dikereja sida nya nyapai pemujur.
Udah nya, pengari Direktor Opis Pelajar Nengeri Sarawak, Abit Hong madah, bisi 88 buah tim ari 162 tim ke bisi ngerejista diri dalam pekit nya mungkus sekula primari, sekondari, sekondari atas enggau orang luar.
Iya madah, pekit nya endang alai ngiga raban pelajar ke ngembuan penau dalam bidang robotik ngambika ulih diangkat ngagai tikas entarabansa.
Nya alai, patut mayuh program dikena nempa penau bala pelajar tu ngambika sida terus nyulut dalam bidang pelajar enggau pengawa luar ti setipak enggau batang tuju juluk opis pelajar menua.
Bela datai ngemataka pekit ti diatur kenyau 15 Ogos tu tadi Pemesai Opis Pelajar Pelilih Bintulu, Abdul Mu’in
Abdul Kassim; pengari Sasbadi Sdn Bhd, Eric Wong enggau Prinsipal SMK Bintulu, Ananthan Subramaniam.