Besabar nganti bulih pengawa ke meruan
Penyampau orang ti begigaka pengawa seruran nambah ninting hari, ku Mawan
SARATOK: Menteri Pemansang Rama, Tan Sri William Mawan Ikom madah, kemaya hari tu pengawa ngiga kereja sebengkah utai ke chukup pedis lalu begunaka mayuh penyabar.
Iya madah, utai ke nyadi nya berindik ari penyampau orang enggau besemekih laban sida ti begigaka pengawa seruran nambah ninting hari.
“Pekara tu patut diperatika rebak baru, sida patut nyikap diri memanah ngambika ulih besemekih, nyema deka bulih kereja ke dikingin diri enggau teulihka pemujur dudi hari.
“Kelimpah ari bulih pemutus ke nyulut dalam peresa, raban sida tu mega patut nemu makit pengawa ke bisi disedia bansa Dayak enggau Bumiputera ngerejista diri ba SPA sereta betapat enggau orang ngulihka pengawa perintah,” ku iya.
Nangkan ke nya, Abdul madah di nengeri tu peluang raban bansa gawa perintah chukup mayuh.
“Taja pia, sida ke berebut bepintaka pengawa mega chukup mayuh.
“Nya alai, dikena nentuka sida mujur bulih pengawa sida patut nykai diri enggau penemu ke chukup,” ku tandu Abdul.
Rambau program nya, Mawan ti mega nyadi Kaban Parlimen Saratok bisi nyuaka chek RM5,000 ngagai raban SDNU pampang Saratok, udah nya Kaban Kunsil Nengeri Krian, Ali Biju meri duit RM1,000 ngagai komiti pengatur program.
Sama bisi datai Chairman Pengatur Program SDNU, Anthony Banyan, Ketuai Eksekutif Symas Management Services, Dr. Thomas Buan, Pemesai Pelilih Saratok, Mohd Ikmal Abdullah sereta lebih kurang 250 sida ti benung begigaka pengawa.