Soldadu biak dilalau nguna semua penemu ke udah dipelajarka sida
MIRI: Raban soldadu ke agi biak dilalau ngambika nguna semua penemu ke udah dipelajarka sida sepemanjai ngulu kus nyadi soldadu maya ke gawa nyaga pengelikun enggau pengelantang menua.
Panglima 9 Briged, Brigedier Jeneral Datuk Muhammad Daniel @ Damien Abdullah madah, pekara tu beguna amat laban penemu ke udah dipelajarka sida nya enti enda dikena sigi nadai guna.
“Penemu ke dipelajarka semua kita sepemanjai kus tu patut dikena. Enti iya dikena orang bukai ulih meda. Tang enti iya nadai dikena, reti nya ukai penemu ke beguna,” ku iya rambau Nutup Kus Repalman Kelas 2 Siri 1/ 2014 ba Batalion 20 Rejimen Askar Melayu Diraja ( 20RAMD), Kem Sri Miri ditu empai lama ke udah.
Sama bisi datai Mandal Pemesai Bekuasa Merintah 20RAMD, Mejar Shamsuri Noordin.
Nangkan ke nya iya mega muji semua pesereta kus laban ke udah nembuka latih enggau mujur.
“Aku deka ngenataika jaku puji ngagai semua kita laban ke udah mujur napi sebengkah penguji dalam latih nyadi soldadu.
“Ba pengawa nyadi soldadu, penguji ke pemadu besai iya nya utai ke nyekat. Nya alai kita patut pintar nguna semua penemu ke udah dipelajar dikena nempuh utai ke bisi nekul dikena nyaga pengelikun diri enggau orang bukai,” ku iya.
Berebak enggau nya, bisi 59 iku soldadu biak nyereta kus nya ti diatur pengelama 16 minggu berengkah 21 April tu tadi lalu tembu Hari Lima minggu tu tadi.
Ari penyampau nya, 39 iku ari sida nya ari 20 RAMD, udah nya 20 agi ari 3 Rejimen Renjer Diraja (3 RRD) Kem Oya, Sibu.
Entara batang tuju bukai kus nya dikena nambahka penemu enggau pengelandik nyadi soldadu ngagai kaban Repal dalam bejalaika pengawa dikena sida ngulihka gaji ngagai Band 2.
Udah nya, Prebet Muhammad Farid Hasbullah Mohd Ariffin, 20, ari 20 RAMD peranak Pulau Pinang dipilih nyadi pesereta ke pemadu manah ba semua atur pengawa.
Udah nya, Renjer Mohd Hairi Haidy Junus, 21, ari 3 RRD peranak Kedah enggau Prebet Mohamad Redzuan Zulkifli, 22, ari 20 RAMD peranak Kelantan bela dipilih nyadi pesereta ke manah dalam akademik enggau ba pengawa luar.