RTM patut lebih kreatif sereta bepemu mantaika penerang

SIBU: Radio Televisyen Malaysia ( RTM) dilalau ngambika lebih kreatif enggau bepenemu maya nyebar penerang ngagai mensia mayuh awakka orang ulih mereti sentang semua polisi perintah.

Sekretari Politik Kepala Menteri, Abu Seman Jahwie madah, semua nya dikena nyekat raba penyakal bekelikuhka penerang ke amat sereta trau ngerachun runding rayat begedika perintah.

“Ambika chunto Chukai Barang enggau Servis (GST) ke udah dikena ba lebih 160 bengkah menua endang seiti sistem chukup ke jauh lebih manah dikena nambahka puku menua.

“Semua tu patut diterangka ngagai rayat enggau chara ke muntang ditemu orang kelebih agi sida ke diau jauh ba entigis menua ulu,” ku iya ba sebengkah pengerami ngintu Hari Raya RTM Sibu, empai lama ke udah.

Bela bisi datai Menija RTM Sibu, Albert Mentri Tudin enggau Penyanding Penemu Kunsil Taklim RTM Sibu, Wan Mohsin Wan Zain.

Abu Seman ti mega nyadi Kaban Kunsil Nengeri (ADUN) Jemoreng merambu RTM ngulihka timbal ari mensia mayuh awak mandangka pemanah kaul sida enggau orang mayuh.

Iya madah, nengah chara ke bansa nya, RTM ulih mereti sentang utai ke dikedeka mensia mayuh.

“Ketegal media sosial ke majak moden, RTM diatu beguna amat dikena mantaika penerang ke betul ngagai rayat,” ku tandu iya.

Rambau pengerami nya, Abu Seman bisi meri duit RM1,000 ngagai Kunsil Taklim RTM Sibu.

Pengerami nya dirichahka enggau mayuh bengkah program kelimpah diperindang enggau lagu Hari Raya.