Hadi muji Kem PLKN Putra Sentosa pemadu manah di serata menua ditu
SEMATAN: Ketuai Direktor Opis Latih Ke Bansa Datuk Abdul Hadi Awang Kechil muji seraya madah, Kem Palan Latih Ke Bansa (PLKN) Putra Sentosa kem ti pemadu manah di serata menua.
Iya madah, kem nya udah nitihka ‘Garis Panduan Minima 2008’ enggau ngembuan ISO (International Organization for Standardization).
“Aku ulih netapka Kem PLKN Putra Sentosa tu kem ti pemadu dikerinduka pelatih sereta mayuh peminta deka nyadi sukarelawan ditu. Disimpul ngena jaku pandak, Kem PLKN Putra Sentosa iya nya kem ti pemadu manah.
“Kami temegah ati laban Kem PLKN Putra Sentosa iya nya kem keterubah bisi ISO sereta kem tu udah tetapika peneka Garis Panduan Minima 2008 ke dipinta ngemanahka agi kem baka ari rumah setengah konkrit ngagai konkrit magang.
“Tu pekara ke patut dikemegahka kitai lalu kem bukai di serata menua tu ulih nunda nama utai ke udah dipejalaika ba Kem PLKN Putra Sentosa,” ku iya.
Hadi mansutka pekara nya dalam aum pengarang berita ti diatur ba Bilik Rehat di Kem PLKN Putra Sentosa ditu, lemai ensana.
Dulu ari nya Hadi ngulu pengerami Hari Raya Aidilfitri 2014 kem nya sereta ngabas projek ngemanahka kem nya.
Lebuh ngenang semua 81 kem PLKN serata menua dipinta ngemanahka kem, iya madah, semua kem patut nitihka atur sereta nembuka projek nya bulan Jun 2015.
“Naka ke diatu nyauka sampal udah nganjung langkar projek sida. Nengah garis panduan minima 2008 nya, pengemeran kem patut ngemanahka rumah setengah konkrit ngagai konkrit magang, disediaka CCTV, surau, klinik, rumah endur apai indai betemu enggau pelatih, rumah komando enggau sapit komando sereta perengka guna mensia mayuh ke bukai.
“Ungkus diguna pengemeran kem Putra Sentosa ngemanahka palan tu lebih RM4 juta, perintah nadai nanggung belanja dikena ngemanahka kem,” ku iya.
Nambahka nya Hadi ngelalau pengemeran kem PLKN bekerejasama enggau raban bansa tauka peranak ke ngelinggi kem.
Kelimpah ari nya, pengemeran Kem PLKN Putra Sentosa Henry Harry Jinep madah, kem nya nyau deka manggai 10 taun, ditumbuh- ka bulan Disember 2004.
“Kem tu berengkah enggau pemesai 25 ikar aja ti deka dikemesaika ngagai 33 ikar nitihka peminta dalam Garis Panduan Minima 2008 ke kontrak baru 2014.
“Pengawa ngemanahka kem tu dipelabaka deka tembu ujung taun tu lalu ulih dikena ba taun baru. Taja pan semua kem ditimpuhka mesti tembu bulan Jun 2015, tang kami arap bendar pengawa ngemanahka kem tu ulih ditembuka ujung taun tu.
Sama bisi ngulu atur pengawa nya, Ahli Majlis Latihan Khidmat Negara Ani Solep, Komandan Kem Lt Kol Rahamen @ Abdul Rahman Wok enggau ke bukai.