Abang Johari: Kuching Marathon diperambu besai agi taun dudi
KUCHING: Pelanda ‘Kuching Marathon 2014’ ke nyadi pemungkal kemari, deka beratika atur pengawa nya nyadi sebengkah program setindit antarabansa belabuh ari taun baru tu ila (2015).
Menteri Dagang Temuai Datuk Amar Abang Johari Tun Openg madah, pemujur nya udah matak urung 5,500 penyereta ukai semina ari menua tu aja tang nyengkaum 30 menua luar bukai ke bisi masuk pengawa nya kemari, enggau penyampau perais ti disediaka dalam mata wang ke mayuh, sereta konsep Marathon ti digaga di Kuching nyelai ari menua bukai ke kala ngatur marathon tu.
“Naka kediatu, Marathon renggat antarabansa bisi diatur di Tokyo, Beijing, Singapore, Kuala Lumpur enggau Penang. Di Kuching, kelai kitai lain mimit, laban gaya rampa menua kitai ke mayuh agi penapi belanda ba penyauh 42 km nya.
“Tambah, Marathon Kuch- ing tu nyamai agi dikangau bepalanka komuniti,” ku iya.
Iya madah baka nya lebuh nutup atur pengawa ‘Kuching Marathon 2014’ ti nyadi pemungkal diatur ulih Opis Kaunsil Bandaraya Kuching Utara (DBKU) enggau Gerempung Kuching Marathon (KMA) ke belabuh diatur ari pukul 2 pagi ngagai pukul 10:30 pagi di Padang Merdeka ditu, kemari.
Ba pekit marathon nya kemari, perais ti bisi disediaka belabuh ari RM15,000 ke penuduk keterubah, lumur dua (RM7,500) enggau lumur tiga (RM4,000) ungkup kategori 42 km bagi lelaki enggau Indu tebuka.
Kelimpah ari nya kategori bukai, iya nya kategori 10km tebuka (lelaki/indu), 21km Veteran (lelaki/indu), 21km Tebuka (lelaki/indu) enggau Marathon Penuh 42km (lelaki/indu/veteran) ke nyendiaka perais ke pengabis besai.
Ba atur pengawa ke sebaka nya mega ti deka diatur dalam skala ke besai agi taun baru tu ila, nyendiaka mata wang dua kali lipat ari penyampau kediatu, iya nya RM30,000 ( lumur satu), RM15,000 (lumur dua) enggau RM8,000 (lumur tiga).
“Semua perais ke taun baru tu ila deka diberi dua kali lipat ari kediatu, lalu nya deka nyadi promosyen kitai ngambika ulih ngaga Kuching tebilang ukai semina ngagai sida ke belanda tang mega ba renggat antarabansa.
“Enggau penyampau perais disedia nya, kitai sebaka enggau sitak menua bukai baka KL enggau Penang ke nyendiaka penyampau perais ke mayuh,” ku iya.
Iya nandu baru, chara Sarawak ngenudukka diri ba renggat antarabansa deka narit mayuh agi orang kitu (Kuching) ngambika Kuching tebilang ba mata dunya, lalu ba pekara bekaul enggau nya mega, opis kaunsil DBKU, MBKS enggau Opis Menteri Pengawa Dagang Temuai (MOT) deka ngemanahka agi perengka guna ti dikena ngatur marathon tu.
Nya alai, iya madah, KMA dipinta nganjung ripot taun tu (KMA 2014) ngagai gerempung antarabansa ngambika ulih meri kelala Kuching ulih nyadi palan marathon.
Marathon Kuching (KM) kemari, urung 2,000 lebih datai ari menua tu empu lalu 2,000 lebih ke bukai ari menua luar nyengkaum sekeda sida ke belanda nya (ari menua luar) orang ke endang udah teleba belanda Marathon di pekit renggat dunya.
“Dini hari sida ke belanda tu nengah genturung pen- diau komuniti kitai di serata Kuching ke dipasang enggau lampu-lampu, lalu kitai beratika mensia mayuh ke diau di genturung pendiau tu semua begempuru ba tisi jalai ngelaluka temuai kitai benung belanda.
“Terima kasih ngagai rayat Kuching ke udah ngulu Marathon tu,” ku iya ke nyerumba KM tu bepalanka komuniti, lalu meri terima kasih ngagai polis (PDRM), soldadu (ATM), raban Opis Pengerai enggau semua ejensi ke udah ngemujurka atur pengawa nya.
Ba KM nya kemari, ke semua kategori 42 km Indu enggau Lelaki Tebuka ke semua penuduk ari lumur satu ngagai lumur tiga dimenang ulih sida ke belanda ari Kenya (Afrika). Malaysia mayuh menang dalam kategori 10km Tebuka, 21km Veteran Lelaki enggau Indu, 21km Lelaki enggau Indu Tebuka, enggau 42km Kategori Marathon Penuh ke Veteran Indu enggau lelaki.