Randau Pemansang SEB nerima kerejasama manah ari penyereta
KUCHING: Sarawak Energy Berhad (SEB) ransing nerenak pemereti ba pekara pengelikun ngagai mensia mayuh ke alai program Randau Pemansang ti disediaka ejensi nya nerima kerejasama manah ari penyereta.
Program Nerenak Pemereti ba radio bagi Iban RTM ngenang senentang isu ti suah nuntung mensia mayuh,” ku sebengkah surat penerang berita kemari.
Program ditukuka Opis Sapit Kepala Menteri nengah kerejasama Gerempung Alumni Dayak Universiti Malaya (PADUM) enggau tuju nyadung penerang senentang polisi perintah sereta projek ke bekaul enggau pengawa rama, ekonomi, pengelikun, main asal, pengawa nembiak enggau dagang.
Serak tu, program ngerandau pasal ‘Nyeliah Penusah Rumah Angus’ ke bekaul enggau chara nyeliah penusah angus ke alai SEB bisi ngambi bagi dalam forum.
Ngarika SEB ba forum iya nya Pemesai Bagi Pengerai enggau Pengelikun (HSE) Patrick Sibat enggau Pemesai ari Opis Bomba enggau Penyah Penusah, James Gani.
Forum dipansut nengah Wai FM enggau ASTRO 871 ke diulu moderator (Kaban Komiti PADUM) Paul Silong.
Rambau forum, Patrick nerang baka ni penusah angus tau nyadi bepun ari perengka lekterik ke rusak sereta ari wayar ke enda disambung enggau betul.
Iya mega nerang senentang chara nyeliah penusah angus ke nyadi ketegal perengka lekterik ke rusak.
“Ketegal bekal lekterik utai ti diguna dalam pengidup ninting hari, kitai patut nemu penusah ke tau nyadi maya bekenaka lekterik ke ngembuan kuasa ti tinggi.
“Berindik ari nya, perengka lekterik patut diengkah jauh ari ai lalu kitai patut seruran matau pengelikun perengka kelimpah ari ngena seiti plug aja.
“Pengawa nyambung wayar lekterik kediri empu ukai pekara ke manah. Kitai patut ngambi orang ke bisi lisin ngaga pekara nya,” ku iya.
SEB udah nusun sekeda program licha pengelikun di sekula, ungkup raban konteriktor, Opis Kereja Raya (JKR), Opis Ai, Telekom, opis kaunsil sereta di rumah panjai.
Kompeni nya mega bisi ngatur program nerenak pemereti senentang pekara pengelikun ba estet sawit kelimpah ari nyadung bup mit ti nerang senentang pengelikun maya bekena lekterik.
Kelimpah ari nya, SEB mega ngatur minggu pengelikun korporat sereta bejalaika pengawa meresa pengelikun lekterik ba mayuh bengkah endur gawa nyengkaum stesen bekal lekterik.