SMK Simanggang minta KPM jampat nimbal peminta ngaga begunan baru
SRI AMAN: Sekula Sekondari (SMK) Simanggang udah nganjung surat ngagai Opis Menteri Pelajar Malaysia (KPM) minta pemendar gaga begunan baru tiga ringkat ba sekula nya laban dikena nukar begunan ke angus kena bulan Julai taun seiti nyin kemari.
Prinsipal sekula nya, Kuso Jantan madahka surat peminta nya udah dianjung ngagai KPM bulan seiti ke udah ngambika diperunding.
Taja pia, piak sekula agi nganti pansik ke silik ari Opis Pengerara Api enggau Penyah Penusah ( Bomba) enggau Opis Kereja Raya ( JKR) awakka pengawa ngererak temawai angus sekula nya ulih dikereja sebedau ke ngentak begunan baru.
Enti Bomba enggau JKR udah ngemendarka pengawa ngererak nya baru begunan baru ulih digaga baru ila, ku iya.
“Aku ngarapka peminta kami ngagai KPM tu bulih pemendar enggau lengkas,” ku iya.
Kuso madah munyi nya ngagai pemberita rambau Pengawa Nyuaka Pemeri Mesin Penyelak enggau Cheramah Pasal Kereja ke diatur Gerempung Alumni Ex Pelajar SMK Simanggang ( PIASMA) di sekula nya kemari.
Rambau nya Chairman PIASMA Kol Mohd Melintang Abdullah diberi basa nyuaka mesin penyelak enggau bejadi program.
PIASMA bisi nyuaka bantu belanja RM11,000 ngagai SMK Simanggang dikena sida ngaga jalai nyengkaum meli mesin penyelak nya.
Mohd Melintang madah, PIASMA sedia mantu sekula nya ba pengawa beripai begulai enggau Gerempung Apai Indai enggau Pengajar enti agih belanja dikena ngaga begunan baru udah dikemendar ila.
“Kami sedia nulung beripai enggau bala apai indai sereta enggau bala pengajar ngentak begunan baru nya ila,” ku iya.
Rambau penusah angus nya suba, dua bengkah blok begunan dua ringkat di SMK Simanggang retung ba penusah ke nyadi urung pukul 4.50. lemai kena 08 Julai 2013.
Dua buah blok beguna ke retung nya opis endur pengajar ngatur pengawa enggau kelas nembiak pom empat.
Api dipelabaka terubah nganguska blok begunan kelas pom empat sebedau ke nyerarai ngagai blok begunan opis pengajar ke berimbai.