Nembiak pom tiga diperansang masuk maktab soldadu
SIBU: Gerempung Veteran Soldadu Malaysia Negeri Sarawak ( PVTMS) nesau nembiak lelaki Pom Tiga 2014 nengeri tu nampung pelajar ngagai Pom Empat Sesi 2015 ba Maktab Soldadu Diraja (MTD), Kem Sungai Besai, Kuala Lumpur.
Presiden PVTMS Thomas Ling madah, awak tu dibuka ngagai semua nembiak lelaki menua tu.
“MTD sebengkah palan belajar ti mega sebengkah ari Sekula Nembiak Pandai (SBP) dibaruh kuasa Opis Menteri Penyaga Menua.
“MTD semampai nempa nembiak ngambika ulih megai penuduk nyadi pemesai ATM, Pemesai Opis Perintah enggau pemesai ti bekaul enggau dagang sereta industri menua tu,” pia ku iya madah ba sebengkah aum media ditu, kemari.
Nembiak Pom Tiga Taun 2014 ke patut minta nampung pelajar ba MTD meseti ngembuan peninggi enda kurang ari 152 cm, pemerat enda kurang 40.5 kilogram (kg), ngem- buan Indek Pengerai Tubuh (BMI) 18 ngagai 27, pemesai buka dada 74 sentimeter (cm) (biasa) enggau 79 cm (maya matak seput), lansik lalu enti ngena cermin mata enda ngelui 6/12, nadai penyakit enggau meseti bulih pemutus enda kurang 7A (nyengkaum Bahasa Melayu, Bahasa Inggeris, Matemati enggau Sains ba PT3 2014.
Kelimpah ari nya, awak tu lebih agi tebuka ngagai nembiak ke chakah bemain, ba muzik, kelab, gerempung beuniform.
Nembiak ke mujur diterima ba MTD deka diau ba buding pechuma, makai lima kali sehari, diberi bup teks, bup tulis, bup kereja enggau bup malin pechuma, ngepan dikena kelas akademik, latih soldadu, lumba enggau main, ngepan bansa, meresa pengerai pechuma, waran pejalai pulai mansang ngagai rumah sekali setaun enggau elawin RM100 sebulan.
“Nembiak ke bisi ati deka ngerejister ba MTD tau minta nengah www.rmc.edu. my sebedau 15 November 2014.
“Sida ke bulih deka dipadah nengah sms lalu semina sida tu aja deka dikangau interbiu nampung pelajar Pom Empat ba MTD taun 2015,” pia ku iya seraya madah taun seiti suba semina empat iku aja nembiak ba nengeri tu nampung pelajar ba MTD.
Penerang silik bekaul eng- gau pekara tu tau ditanya nengah lumur 03-89465565 tauka email ngagai pemilihan@rmc.edu.my
Kelimpah ari nya, penerang silik mega tau ditanya ngagai Maktab Tentera Diraja, Sel Pemilihan Pusat Pengurusan Maklumat, Kem Sungai Besi, Kuala Lumpur nengah lumur 03- 90867471 tauka 03-90867475 enggau Opis PVTMS nengah lumur 084349755 tauka 084-341935.