Kaban SPDP dilalau ngenanka penyerakup
SIBU: Kaban Parti Demokratik Progresif Sarawak (SPDP) dilalau seruran ngenanka penyerakup sereta gawa enggau tuju meri penyamai ngagai semua lalu ukai ngambi ungkup penyenang diri.
Pemansang Presiden iya, Datuk Seri Tiong King Sing madah, perintah Barisan Nasional (BN) bejalaika atur pengawa ke nyengala dipeda nadai bechiping laban deka meda rayat idup nyamai.
“Nya alai, beguna amat ayu penyerakup enggau saum penemu dalam sebengkah parti ke diarika mayuh pupu raban bansa.
“Kelimpah ari nya, kitai patut ngereja pengawa enggau tuju meri pengelantang nga- gai semua dikena ngenanka pengering parti.
“Nama utai ke nyadi dalam parti endang ketegal bala ketuai.
“Parti tu deka terus beserakup pengudah dituntung penyarut dalam parti.
“Baka sehari tu, kitai begempung laban deka ngemansangka parti ungkup rayat,” ku iya ti mega nyadi Kaban Bintulu rambau Pengerami Merarau Begulai Enggau Bala Kaban SPDP Kandang Menua Tengah ditu, kena Hari Minggu tu tadi.
Bisi 2,000 iku kaban ari semilan janga SPDP iya nya Repok, Meradong, Pakan, Meluan, Bukit Assek, Dudong, Bawang Assan, Pelawan enggau Nangka datai ngulu pengerami nya.
Nangkan ke nya, Kaban Parlimen Mas Gading Anthony Nogeh nyemetak madah SPDP agi ulih diguna taja pan betapi enggau penyarut ke nuntung parti berindik ari penyampau kaban baru ke bisi nambah maya roadshow ba serata nengeri.
“Mayuh udah munta nyadi kaban SPDP. Tu mandangka SPDP agi ulih diguna.
“Nama utai ke pemadu beguna iya nya kaban SPDP patut seruran begempung dalam parti begulai enggau BN,” ku iya.
Chairman pengatur pengerami Teo Boon Siew rambau ke bejaku minta pan- gku pengawa tuai raban bansa ba kandang menua tengah diberi ngagai SPDP ngambika kaban SPDP ulih bejalaika pengawa lebih manah ngagai mensia mayuh.
Rambau pengerami nya mega, Tiong bisi nerima pom minta nyadi kaban baru kira 387 iku ari Dudong, Nangka, Bukit Assek, Bawang Assan, Pelawan sereta 265 iku ari Meradong.
Bela datai Sapit Sekretari Besai SPDP Paul Igai, Presiden Parti Se’Ati Rayat Sarawak ( SUPP) Tan Sri Peter Chin, Sekretari Besai SUPP Senator Datuk Dr Sim Kui Hian enggau chairman pengatur pengerami Datuk Lau Cheng Kiong.