Mong temegah meda pemujur Pekit Gendang Pampat Sri Aman

SRI AMAN: Raban bansa Iban di menua tu patut berasai temegah nengah sebengkah main asal ke dikumbai gendang pampat lalu jarang didinga ba menua tu.

Asil ari langgur penemu Menteri Muda Betanam Betupi, Datuk Mong Dagang ( gambar) ngujungka iya bekerejamasa enggau Sekula Primari (SK) Melugu Sri Aman ngatur Pekit Gendang Pampat Sri Aman ditu kemari.

Pekit tu dipasuk enam bengkah tim ti ngarika rumah panjai ke besemak. Taja pia, bisi tim ari Julau enggau Miri ke sama deka nyereta pekit tang meh ditulak laban komiti program deka meri peneleba ngagai tim ari menua Sri Aman dulu.

“Dudi hari nyangka deka dibuka ngagai komuniti Iban ari luar menua Sri Aman,” ku Mong rambau nutup Pekit Gendang Pampat 2014 nya ditu kemari.

Berebak enggau nya, Kaban Kunsil Nengeri ( ADUN) Bukit Begunan tu nyadaka pengaga ati meda pengeransing raban pemekit ke udah ngambi bagi.

Iya madah, tu meh keterubah iya meda raban bansa Iban beamat-amat ransing ngangkatka main asal bansa diri empu.

Kelimpah ari nya, iya berasai temegah meda pemanah atur program ke mujur mandangka bala pemekit enggau bala komiti pengatur ke bisi datai bela ngena ngepan bansa Iban.

Rambau pekit tu tim ke ngena gelar Lang Ngindang Bukit Kelingkang ari Gua mujur nyadi champian ditangkan enggau tim Seri Kelingkang Po Ai lumur dua enggau tim Gerugu Batu Kelingkang, Pantu bulih lumur tiga.

Nangkan ke nya, tim Seri Kelingkang Gerempung Apai Indai enggau Pengajar (PIBG) SK Selepong, Po Ai Berjaya enggau Lang Nyangai ari Melugu Skim bela nerima perais pengaga ati.

Bela datai ngematak pekit tu, Kepala Pengajar SK Melugu, Louis Aom, Pemesai Khas ngagai Kaban Parlimen Sri Aman, Edmund Pirang sereta bala ketuai opis perintah.