Langkar atur pengawa JKKK patut dikemanah
Anang nitihka penemu bechiping maya mutarka penanggul lalu kaban JKKK patut lurus penemu
PAKAN: Komiti Pemansang enggau Pengelikun Genturung Pendiau (JKKK) patut ngemanahka agi langkar atur pengawa ba tikas kampung enggau rumah panjai ngambika dipeda lebih teratur sereta meruan, ku Menteri Pemansang Rama, Tan Sri William Mawan Ikom (
Iya madah, JKKK patut nyingkang nitihka pemansang dunya ke maya hari ngambika peranak kampung enggau rumah panjai ke dijaga JKKK bela ngasaika pemansang ti diberi perintah ngagai JKKK nengah mayuh bengkah program.
“Tanggungpengawa JKKK tu besai amat. Sida ke udah dipilih nyadi kaban komiti, sekalika nya ke bepangkat tinggi nyentuk ngagai kaban biasa patut bisi ngembuan runding enggau nemu pemansang ke bisi nyadi ngelinggi sida ke maya hari tu.
“
Tanggungpengawa JKKK tu besai amat. Sida ke udah dipilih nyadi kaban komiti, sekalika nya ke bepangkat tinggi nyentuk ngagai kaban biasa patut bisi ngembuan runding enggau nemu pemansang ke bisi nyadi ngelinggi sida ke
” maya hari tu. Tan Sri William Mawan Ikom Menteri Pemansang Rama
“Enti bisi ngembuan runding ke bansa nya, nya baru JKKK ulih nyingkang sereta besemekih enggau JKKK bukai kelebih dalam mayuh pekara nyengkaum nemu penerang ke beguna ke tau dipekunsi ngambika dikemansang sereta meri penguntung ngagai semua orang,” ku iya.
Mawan madah munyi nya rambau program Bengkel Ngenegapka JKKK diatur Opis Pekara Khas (JASA) Julau enggau Opis Kastam Kastam DiRaja Malaysia, kemari.
Program nya digulu kira 100 iku kaban JKKK ari sitak Kunsil Nengeri (DUN) Pakan lalu diatur ba Dewan Pakan.
Mawan madah, JKKK mega patut pintar nguna agih belanja lalu guna agih nya enggau tuju ke betul awakka meri pemanah ngagai semua.
Maya nya, Mawan nesau bala kaban JKKK awakka terus bejalaika tanggungpengawa sida enggau manah.
“Kitai deka meda bepun ari diatu, JKKK, Tuai Rumah (Tr.) Ketuai Kampung enggau Tuai Raban Bansa patut bejalaika tanggungjawap diri nyadi orang tengah entara perintah enggau rayat enggau chara ke betul sereta lurus.
“Anang nitihka penemu bechiping maya mutarka penanggul lalu kaban JKKK patut lurus penemu. Genap penanggul ke bisi nuntung nembiak redak patut diperunding sereta dikenatai ngagai orang ke besangkut paut.
“Ba pekara tu, pintu kami ke nyadi ketuai seruran ditukang laban prinsip kami Barisan Nasional (BN) endang deka ngemansang enggau nulung rayat nengah mayuh pemansang, lalu ukai besemaya puang baka sekeda orang,” ku Mawan.
Iya ti mega nyadi Kaban Kunsil Nengeri ( ADUN) Pakan mega madahka menua Pakan agi tubah begunaka mayuh pemansang kelebih agi perengka guna baka bekal ai beresi, kuasa karan, jalai enggau utai bukai.
“Nya alai enggau nya kami ngarapka raban opis perintah ba Opis Pelilih, Opis KEMAS enggau opis bukai betanggungkawap meri penerang enggau lengkas ngagai kami bekaul enggau penanggul ke bisi nuntung rayat ba menua ke dijaga sida.
“Enggau chara tu kami ngarapka ulih mutarka penanggul ke bisi nuntung mensia mayuh ba sebengkah endur nya lengkas,” ku tandu Mawan.
Dulu ari nya, Residen Sarikei, Dahim Nadot ba jaku pengelalu iya madah, tuju program tud iatur dikena ngemanahka agi JKKK awakka nyingkang ngagai tikas ke setipak enggau pemansang ke maya hari.
“Batang tuju kami ngatur program tu deka ngiri penemu ngagai ketuai JKKK. Berebak enggau nya mega, nyadi sebagi ari chara kami nambahka peransang penemu dikena sida muntang bejalaika pengawa enggau mayuh bengkah ejensi.
“Program tu mega tau nempa JKKK awakka ulih mantu mensia mayuh ba menua pesisir ngasaika pengidup ke lebih nyamai, laban JKK endang sebengkah komiti ke pemadu besai ba tikas genturung pendiau,” ku tandu Dahim.
Mayuh bengkah aktiviti bisi diatur nyerumba seminar nya baka meri penerang sentang tanggungpengawa JKKK, penerang sentang programprogram ke bisi disediak opis menteri ke ulih dikena ngemansangka JKKK enggau rayat sereta meri penerang sentang pupu GST.
Bela datai maya program tu Pemesai Pelilih Pakan, Alex Liau, Pemesai Jasa, Sylvester Embuas, Pemesai Opis Kastam DiRaja Malaysia, John Apau sereta sekeda bala tuai raban bansa ba menua nya.