Dunya ngemeratka pengereja pengawa di kapal
SIBU: Dunya kebendar iya balat bepanggai ngagai pengawa orang ba kapal, ku Menija Besai Pelita Maslaut Sdn Bhd (PMSB) Mohamad Nazim Masni.
Iya madah, nyangka mayuh orang enda nemu pemesai reti tanggung pengawa orang ke gawa ke tasik tauka kereja kapal di serata menua, lalu 90 peratus ari perengka dalam rumah bepanggai ngagai orang ti kereja ke tasik.
“Ninting taun lebih ari 12 bilion tan barang guna nyengkaum utai pakai, perengka pengangkut, enggau perengka guna ke bukai dianjung 1.5 juta orang ti gawa ba tasik di serata dunya ngena perengka pengangkut tasik ungkup 7.2 bilion rayat ba dunya tu.
“Nya alai, anang ngemaruhka pengawa orang ti kereja ke tasik laban sida besai tanggung pengawa lalu meri pangka ngagai semua orang,” ku iya.
Iya madah munyi nya rambau Pengerami Konvokesyen enggau Tembu Kus Latih Marin Palan Latih Maritim Pelita Maslaut Ke-24 ke diatur ba Dewan Suarah Sibu, empai lama ke udah.
Pengerami tu dipenyadi Kaban Kunsil Nengeri (ADUN) Nangka Dr Annuar Rapa’ee.
Bela datai Direktor Pengawa Raban PMSB Masni Amit, Direktor Pengawa Jaya Coastal Sdn Bhd Datuk Albert Ling, Mandal Direktor Opis Yayasan Sarawak Yantiska Mahmud, Pemesai Opis Tasik Kandang Menua Tengah Opis Tasik Sarawak Noorazman Abdul Wahab enggau Superintenden Kru ari Kompeni Sealink Sdn Bhd Leonard Luhat.
Nazim madah, lebih kurang 1.5 juta orang ti kereja ke tasik ba dunya gawa di kapal betapi enggau mayuh pemedis enggau penusah ke enda disadang ninting hari laban ti deka ngetanka ikas ekonomi dunya.
“Sida ti gawa ke tasik ngereja pengawa ke pedis, jam ngereja pengawa lama lalu napi semua gaya hari, pengidup nadai tentu bisi mayuh kaul sereta awakka ke mimit enggau diri sebilik,” ku iya.
Nangkan ke nya, iya madah pengawa tu chukup pedis sereta meseti ngembuan tanggungpengawa ke besai.
“Beserara ari diri sebilik pengelama bebulan- bulan endang utai ke nadai nemu putus ba pengidup orang ke gawa ke tasik, betapi enggau raban penyelawai enggau kapal ke nadai lisin mega nyadi penusah ke enda disadang sida ke gawa ke tasik,” ku iya.
Berebak enggau nya, iya madah PMSB endang sebengkah palan latih ke udah diaku manah ulih Opis Tasik Menua Malaysia lalu bisi nyedika latih pengelandik enggau pengelikun lebuh gawa ke tasik.
Palan PMSB, ku iya bejalaika tanggung pengawa ngajar enggau nyediaka latih ti bekualiti ngagai bala pelatih.
“Kenyau PMSB ditumbuh ba taun 2001, kami udah ngadaka 1,200 orang kereja ke tasik kelebih agi raban nembiak peranak nengeri tu.
“Sebengkah batang tuju palan kamu tu iya nya deka ngurangka diri bepanggai ngagai orang luar gawa ke tasik lalu nitihka rikut diatu semina 40 ngagai 50 peratus aja orang ti gawa ke tasik nya peranak menua tu gawa ba kompeni-kompeni kapal di menua kitai,” ku iya.