Bajet 2015: Perintah nengeri minta mayuh agih ungkup perengka pengerai

KUCHING: Nengeri Sarawak amat begunaka agih belanja ke mayuh ari perintah besai dikena ngemanahka agi perengka guna ba hospital enggau kelinik perintah.

Menteri Muda Pengerai Rama, Datuk Dr Jerip Susil madah perintah nengeri ngarapka agih belanja dikena ngemanahka perengka guna ba Hospital Besai, Hospital Sibu enggau Hospital Miri bisi dipasukka dalam Bajet 2015.

Kelimpah ari nya, ku iya nengeri tu mega begunaka agih belanja dikena ngaga kelinik ba menua pesisir.

“Agi mayuh pekara ke patut digaga ba nengeri tu laban Sarawak agi jauh tinggal kelebih agi ba sukut perengka pengerai,” ku iya.

Jerip madah munyi nya rambau aum pengarang berita pengudah nutup Aum Luka Transborneo 2014 ditu kena Hari Minggu tu tadi.

Iya madah, pekara ke lebih dikemeran iya nya nambahka perengka guna ba sepital besai di serata nengeri lalu tu beguna timpuh setaun tauka dua taun endur dipejalai.

“Mayuh perengka ke diguna ba sepital enggau kelinik perintah di nengeri tu nyau luya sereta patut diganti nitihka pematut,” ku iya.

Dr Jerip madah perintah nengeri bisi merambu deka nambahka penyampau sepital dudi hari.

“Tu projek pemansang ke nadai ngetu baka ngaga hospital di Lawas, Sri Aman enggau Petra Jaya kelimpah ngaga kelinik ba menua pesisir,” ku iya.

Nangkan ke nya, Direktor Hospital Besai Sarawak, Dr Chin Zin Hing madah, rintai peminta agih belanja ke deka dikena nambahka perengka guna hospital di nengeri tu udah dianjung ngagai Opis Menteri Pengerai ngambika diperunding.

“Kami ngarapka perintah besai setuju enggau peminta nya,” ku iya.

Dulu ari nya, Dr Jerip bisi madah kutak telih enggau produk ngubat telih patut disadung ba menua pesisir kelebih agi ba kandang menua ke jauh ari kelinik.

Iya madah, telih mit tau nyadi besai nyema laun diperubat. Bisi 500 delegit ari 20 bengkah menua nyereta Aum Luka Transborneo 2014 ke berengkah Hari Lima minggu tu tadi. — Bernama