Pesta Pakan diatur berengkah 22 nyentuk 29 Ogos tu
PAKAN: Sebengkah pengerami ke dikumbai ‘Pesta Pakan’ endang diantianti komuniti ba endur tu ke deka diatur bepalan ba tanah laman besai Pakan, kena 22 ngagai 29 Ogos tu.
Pengari komiti pengerami nya madah, pengerami ungkup taun tu ngatur mayuh bengkah program ke lebih manah bebanding enggau taun ke udah.
Pengerami tu diatur begulai enggau Opis Pelilih Pakan enggau Opis Residen Sarikei tu, ku iya bela nerima sukung ari Opis Menteri Dagang Temuai Sarawak.
Menteri Kanan ti mega nyadi Menteri Pemansang Rama Tan Sri William Ma- wan Ikom dijangka deka bejadi enggau nutip pengerami tu.
Entara program besai ke deka diatur rambau tu ila iya nya Safari Berakit, Pekit Nyumpit, Pekit Asil Utai Tanam, Futsal, Badminton, Asil Pengelandik Jari enggau Ngelakuka Pemakai Asal,Pekit Nyumai enggau Pekit Nyura Nembiak.
“Enda tinggal, kami mega bisi ngatur program cheramah dikena meri penemu pasal pekara pelajar ngagai bala apai indai enggau bala nembuak sekula nyengkaum cheramah kimpin begedika dadah,” ku iya lebuh dirandau media, kemari.
Iya madah, pengerami taun tu bela deka dirichahka enggau pengawa mandangka main asal nyengkaum pekit Kumang enggau Keling Pakan sereta pekit karaoke ungkup mensia mayuh.
Program ke penudi nutup pengerami tu, iya nya Pekit Kumang enggau Keling ti dibuka ngagai semua peranak bansa Dayak.
Ngagai barang sapa ke deka nyereta pekit tu, atur pengawa ke ditetap sida meseti beumur entara 18 ngagai 30 taun, sereta agi rumpas.
Maya nyereta pekit tu, sida meseti ngena ngepan Iban.
Berebak enggau nya mega, genap sida ti bisi ngambi bagi dipinta mayar yuran RM20, disempulang enggau salin tingki.
Ngagai indu dara ke nyereta pekit tu sida ulih ngambi pim ari Nurai Chendang nengah lumur 014 8870227, Dura Chindan (013 8346570) enggau Winnie Rais (01119695787).
Ngagai sida ke bujang deka nyereta pekit Keling sida ulih ngambi pom ari Imau Maleng nengah lumur 01115387072, Limau Shanker ( 013 5673697) enggau Dophina Sia (013 8318244).
Nangkan ke nya ngagai barang sapa ke deka nemu penerang silik sentang pengerami ulih ngambi penerang ari Opis Pelilih Pakan.