Pengawa nanam padi bansa MR236 penyungkak penatai pemisi peranak di genturung Skuduk Chupak
KUCHING: Peranak menua di genturung pendiau Skuduk Chupak ti ngemeranka pengawa bumai dua kali setaun, ngasaika penguntung ari pengawa nanam padi bansa MR236, ti teulihka asil urung RM5,000 sekali ngetau.
Padi ti ditanam ba umai paya di Skuduk Chupak, iya nya beras Bajong, sebansa beras ke mar sereta asil iya mayuh agi ari bansa benih padi bukai.
Penyampau bansa Bidayuh ti ngemeranka pengawa bumai di genturung nya bisi urung dua ratus iku, pemungkal ngereja pengawa bumai dua kali setaun di Sarawak, taja pan umai sida enda besai tang asil sida tau bendar nyungkak penatai pemisi.
Dalam taun 2010 kompeni Ceria Agriculture Services Sdn Bhd ( CASSB) bekerejasama enggau Gerempung Orang Bumai Nengeri Sarawak ( PPNS) belabuh ngereja pengawa bumai ngena chara moden.
Direktor pengatur pen- gawa CASSB Thomas Hii Tiong Kong madah, maya kompeni nya belabuh bekerejasama enggau komuniti di genturung pendiau nya, kompeni nya semina mantu sida dalam pengawa ngetau ngena perengka moden.
“Kandang berapa taun tu ke udah kami beratika mayuh orang udah ngasuh komuniti dia nguji mayuh macham produk kena bumai nyengkaum baja, rachun ke manah sereta benih padi.
“Lalu ditambah agi enggau kurang pansik ari Opis Betanam Betupi (JPS), kami pan enda ulih mantu komuniti dia ngasuh sida iya nguji benih padi ke manah sereta enda ulih mantu sida nambah pemisi,” ku Hii.
Nyau kelama udah nya, kompeni CASSB berandau enggau komuniti dia enti sema kompeni nya ulih mantu sida bumai sereta meri asil ke manah laban beratika komunti dia pan nyau udah nadai jalai bukai agi deka ngemanahka asil sida.
Asil umai sida suba bisi beras burak, mirah, chelum sereta pulut. Dalam makit baka ke diatu, nadai orang deka meli beras ke bechampur.
Berindik ari nya, CASSB sedia mantu komuniti dia nanam benih baru iya nya MR236 ke ngeluarka asil mayuh lalu tau diketau dua kali setaun.
“Pengawa kami ngagihka benih ungkup 170 hektar tanah alai bumai enggau pukul rata 20kg/ha ari urung 3 ton benih padi, enggau penguntung makit urung RM9,000 ngagai RM10,000,” ku iya madah lebuh dikerandau maya mai pemberita nemuai ngagai umai di genturung pendiau nya.
Lebuh ngaga pengawa bumai nya, kompeni CASSB semina mantu komuniti dia dalam pengawa ngetau sereta ngagih benih padi seraya dibantu JPS dalam servis perengka guna sereta sabsidi.
“Tu chara ke enda ngerua belanja, tiap asil ke ulih sida iya, enti sema 4 ton, orang ke bumai nya deka bulih pen- guntung RM5,000. Pengawa sida iya semina ngeluarka duit RM450 ari kuchek diri, pengawa ngetau ulih digaga sehari, udah nya semua padi nya disimpan dalam kambut plastik,” ku iya.
Enti suba, chara ngetau chara tradisional tauka chara lama endang patah nyau nesau bala di genturung pendiau dia ngaga ‘gotongroyong’, lalu udah nya lebuh ngetau, bedau semaya enti ulih tembu dalam sehari.
“Baka diatu, ngetau dua kali setaun, udah nyimat timpuh ngetau nya laban diatu bisi injin ngemuntangka pengawa ngetau.
“Kami ngarapka JPS ulih meda asil ari benih padi MR263 ke ditanam orang bumai ditu,” ku iya.
Sama bisi ngulu atur pengawa nya, Penyanding Penemu Kaban Kaunsil 1Malaysia Sarawak Datuk Billy Abit Joo sereta Kaban Parlimen Mas Gading, Anthony Nogeh.