Menua EATOF deka besaup ngemansangka dagang temuai
KUCHING: Sepuluh buah menua ke diperabung East Asia Inter-Regional Tourism (EATOF) kemari udah nyain sempekat begempung ngemansang dagang temuai ba tetiap menua.
Chairman Gempuru Besai EATOF ke 14 Datuk Amar Abang Johari Tun Openg madah, sempekat ke disain nya deka nentuka semua menua EATOF besaup ngangkatka palan pematak temuai kelimpah ti besaup ngemujur tiap bengkah program dagang temuai ke bisi diatur.
“Pengari ari 10 buah menua EATOF besilih penau sereta pengelandik dalam atur ngemansang industri dagang temuai.
“Tetiap palan pematak temuai ke dikemisi dalam kandang menua EATOF deka diangkat nengah chara begempung lalu semua program pematak temuai ke bisi diatur deka disaup.
“Sempekat ke disain nya deka nentuka produk dagang temuai enggau program nerima sukung ari 10 buah menua ke diperabung EATOF. Tu deka nentuka kandang menua EATOF ulih besemekih enggau menua bukai ba industri dagang temuai,” ku iya.
Iya mansutka jaku tu ba seiti aum enggau pengarang berita pengudah ngulu semua 10 iku pengari ari tetiap buah menua ke nyain sempekat rambau Gempuru Besai EATOF ke 14 ditu, kemari.
Abang Johari ke mega Menteri Dagang Temuai enggau Berumah netapka industri eko-dagang temuai dalam kandang EATOF deka dikemerat nengah sempekat ke disain.
Ku iya, EATOF ngembuan pengelebih ba Eko-Dagang Temuai enti dibandingka enggau menua bukai lalu ketegal nya industri bepelasarka eko-dagang temuai deka diangkat ba tetiap 10 buah menua.
“Kami setuju deka ngiga chara baru ke tau dikena ngelaku industri eko- dagang temuai. Tetiap buah menua EATOF ngembuan pengelebih ba industri tu ke alai mayuh macham produk dagang temuai ulih dike- mansang jauh agi.
“Kaul tetiap 10 buah menua ba pekara tu deka dirat ngambika industri dagang temuai dalam kandang menua EATOF ngerembai,”ku iya.
Lapan bengkah sempekat udah disain rambau pengawa nya kemari ke alai Abang Johari nyain ngarika Malaysia.
Menua Korea diarika Kim Mi Young (Mandal Gobenor Gangwon), Laos Saisamone Khomthavong ( Mandal Gabenor Luang Prabang), Cambodia Bun Tarith (Sapit Gabenor Siem Reap), Mongolia Nachin Munkhbaatar ( Mandal Gabenor Tuv), Philipines Agnes A Magpale ( Mandal Gabenor Cebu), China Zhao Xiao Jun (Direktor Besai Kandang Menua Jilin), Vietnam Vu Thi Thu Thuy (Mandal Chairwomen Komiti Quang Ninh), Jepun Moritani Kunihiko (Direktor Besai Bagi Main Asal enggau Dagang Temuai) sereta Indonesia diarika Kanjeng Gusti Pangeran Adipati Ario Paku Alam IX ( Mandal Gabenor Yogyakarta).
Ba aum pengarang berita nya, Abang Johari netapka perintah Nengeri Sarawak ngungkupka bantu 30,000 dollar Amerika ngagai Cebu, Filipina ti udah dituntung penusah biau balai bedau lama tu tadi.
Gempuru Besai EATOF ke 14 diatur ngelama 3 hari berunggu berengkah kena 4 nyentuk 6 September 2014.