SADIA Kuching ngintu pengerami ulang taun 26 sept tu
KUCHING: Main asal ke nyadi identiti bansa Iban deka dipandang ba pengerami ngintu 28 taun penumbuh Serakup Dayak Iban Sarawak (SADIA) pampang Kuching kena 26 September 2014.
Chairman Datuk Dr Anthony Nait madah, pengawa nya berat ngambika main asal nya seruran dipeda lalu dipelajarka raban nembiak rebak baru ke nyadi penampung peturun.
“Kitai (SADIA) pampang Kuching seruran ngemeratka pengawa ngintu pemaik main asal kitai bansa lalu angkun nentuka main asal nya dipeturun ngagai nembiak rebak baru.
“Ba malam ngintu 28 taun penumbuh SADIA pampang Kuching nya ila, main asal baka ke beramban, beganu, renung sereta gendang pampat deka dipandangka ngagai bala pengabang ke datai,”ku iya lebuh dirandau kemari.
Iya nambah, kelimpah mandangka main asal, pengerami mega diatur enggau tuju ngingatka penumbuh SADIA pampang kuching ke ditumbuh kena 4 Jun 1986 menya.
Ku iya, kenyau ditumbuh serakup enda kala limpang ari tuju asal lalu deka seruran ngemerat pemaik main asal bansa setipak enggau ubah pemansang dunya.
Ngenang kaul ke sama, Anthony madahka pengerami malam nya mega deka ngerapitka kaul kitai Iban begulai enggau pangan diri kelimpah enggau bansa bukai.
“Lebih 700 iku pengabang diadang datai ngulu pengerami ngintu 28 taun penumbuh SADIA pampang Kuching nya ila lalu kitai meransang orang bukai datai enggau berami,”ku iya.
Seiku orang ke tebilang ba pengawa main asal, Jackson Janda deka mandangka sekeda main asal ngagai pengabang ke datai.
Kaban Kunsil Nengeri (ADUN) Balai Ringin Snowdan Lawan disadang datai bejadi pengerami ke diatur di Palan Kristian Ekumenikal ditu.
Ngenang kaul bukai, Anthony madah serakup diatu benung ransing ngadu kelas ngajat (renggat kedua) ba opis SADIA di Kota Sentosa.
Iya madah ba renggat keterubah suba penyampau 80 iku orang tuai biak udah enggau nyereta kelas lalu ba renggat kedua tu, kelas mengkang dibuka ngagai mensia mayuh ke deka belajar ngajat.
Kelas belajar ngajat renggat kedua ke diatur Indu Opis Serakup Dayak Iban Sarawak ( SADIA) enggau SADIA pampang Kuching berengkah 1 September ke udah lalu deka dipejalai nyentuk pengujung bulan Oktober 2014.
Sebarang penerang senentang kelas ngajat tu tau betanya ngagai Mabong Unggang ba lumur 012-6925562, Elsie Joannes 013-8000544 tauka Joe Frazier 016-8589364.