Baya ayan di sungai Fasa 6 Tudan deka ditangkap SFC

MIRI: Sarawak Forestry Corporation (SFC) enda lama agi deka nangkap baya ke ayan di sungai Fasa 6 Tudan ditu.

Baya nya suah dipeda ayan ba sungai nya ke besambung enggau Sungai Bilat membimbangkan penduduk di sekitar Fasa 6 Tudan.

Seiku ari peranak menua nya, Johari Sahari ke bisi muka sebuah bengkel ba ngerimbai sungai nya madah, ambis mimit empat iku baya bisi ba sungai nya lalu seiku baya burak.

“Aku muka bengkel kerita ditu kenyau tiga bulan ke udah lalu aku suah tepedaka ambis mimit empat iku baya ke bebida pansut ari sungai nya.

“Kekadang baya nya bisi dipeda niki ke tebing ngeradai lalu meranggapka nyawa. Amat ngasuh ati takut,” ku iya.

Iya madah, semua jelu nya entara tiga ngagai 10 kaki pemanjai suah ayan sebelah nya.

Ku iya, peranak ba menua nya kala nguji nangkap baya nya ngena mata nginti tang enda ulih.

“Kami kala nguji ngumpan enggau nangkap sida (baya) tang puntan laban jelu nya chukup kering.

“Sida (baya) terus nagup umpan enggau mata gintu maya kami nguji nangkap sida,” ku iya.

Nangkan ke nya, Menteri Muda Penyambung Datuk Lee Kim Shin ke bela bisi ngabas ngagai palan nya ensana madahka iya udah madahka pekara nya ngagai SFC lalu SFC enda lama agi deka nangkap semua baya nya.

“Aku udah madahka pekara tu ngagai SFC dua minggu ke udah lalu sida (SFC) madah ngagai aku sida kala nguji ngetan panjuk tang enda bulih.

“Pengawa ke digaga sida nya nyangka begunaka awak lalu piak SFC mega deka nguji ngena umpan,” ku iya seraya madahka piak SFC deka seruran ngemataka sungai nya.

Lee ti mega nyadi Kaban Kunsil Nengeri ( ADUN) Senadin madahka, penatai baya nya tau ngeruga pendiau peranak menua nya kelebih agi bala anak mit.

Nya alai, iya ngelalau mensia mayuh ba menua nya bejimat-jimat anang ngelakka anak sida bemain semak sun- gai nya.

Ketuai Raban Pengesah Lengkas Jelu Siga (SWAT) SFC Miri Ramli Adenan madah, seraban staf SFC nyengkaum lampan iku sida deka dianjung gawa nginau enggau nangkap semua baya nya.

“Kami melabaka lebih ari lapan iku baya ba endur nya lalu raban kami deka ngemataka endur nya kelebih agi maya malam hari dnginau semua baya nya,” ku iya.

Iya madah raban SFC mega deka minta saup pengereja pengawa ari Taman Buaya Miri.

Berindik ari nya, Ramli ngelalau mensia mayuh ke diau ba kandang menua nya anang muai uras ngagai sungai laban nangika dilawa baya nya.