Jaku Iban deka majak dikemansang: Raymond
Berindik ari tuju tu institusi palan belajar ti bekaul deka besaup ngatur mayuh program
SIBU: Naka ke diatu bisi 98 iku nembiak benung ngambi Progam Ijazah Sarjana Muda Perguruan (PISMP) Bahasa Iban ba serata nengeri.
Direktor Institut Pematih Pengajar (IPG) Kampus Rajang Raymond Gai Panting @ Gaie ( gambar) madah, IPG Kampus Rajang diatu udah nerima empat bengkah raban ba program Jaku Iban.
“Ba IPG Kampus Rajang, bisi 83 iku nembiak lalu ari penyampau nya 24 iku deka tembu belajar bulan November 2016,” pia ku iya madah.
Iya mantaika jaku nya maya pengerami bejadika
“
Naka ke diatu nengeri Sarawak udah bisi 98 iku nembiak ngambi PISMP Bahasa Iban. Raymond Gai Panting @ Gaie
” Direktor IPG Kampus Rajang
Progam Ijazah Sarjana Muda Perguruan (PISMP) Bahasa Iban enggau Simposium Bahasa Dan Sastera Iban ditu, kemari.
Bela bisi datai maya tu iya nya Rektor Institut Pematih Pengajar Malaysia Sulaiman Wak.
Raymond mega madah, bulan Jun tu tadi, IPG Kampus Sarawak, Miri udah ngambi 15 iku nembiak lalu deka tembu belajar bulan Mei 2019 ila.
“Enggau nya, naka ke diatu nengeri Sarawak udah bisi 98 iku nembiak ngambi PISMP Bahasa Iban,” ku tandu iya.
Ku iya, laban PISMP Bahasa Iban baru ditengkebang, IPG Kampus Rajang meseti bekempit enggau institusi palan belajar ti bekaul ke bukai ba tuju ngangkatka ngerembaika pemansang Jaku Iban seririh enggau tuju Kaunsil Akreditasi Menua (MQA).
“Kitai deka bekempit enggau Universiti Malaysia Sarawak (UNIMAS), Opis Pelajar Nengeri Sarawak, Universiti Pendidikan Sultan Idris (UPSI), Yayasan Tun Jugah, Gerempung Pemansang Jaku Iban (AEDIL), Yayasan Kebudayaan Dayak, Kaunsil Penusun Adat enggau institusi ke bekaul ke bukai.
“Ba tuju ke sebaka mega kitai udah tu (tembu pengerami) bisi ngatur Simposium Bahasa enggau Sastera Iban,” ku iya madah.
Berebak enggau tu mega Sulaiman madah, PISMP deka nempa pengajar ukai semina nitihka peminta penyampau pengajar ba sekula tang pengajar ti ngembuan pengelandik nitihka Outcome Based Learning (OBE) ti udah ditetapka.
“Kitai mega ngarapka pengajar Jaku Iban ari program tu ila bela begempung bejadi Pelin Pemansang Pelajar Malaysia,” ku iya.
Sulaiman mega madah, Simposium Bahasa enggau Sastera Iban sebengkah ari chunto kerejasama entara IPG Kampus Rajang nyadi pemungkal PISMP Jaku Iban enggau institusi pelajar ti bekaul dikena ngerembaika agi jaku Iban.
Kelimpah ari nya, ku iya, nembiak ke enggau PISMP Jaku Iban patut berasai temegah ati laban diberi awak ngambi bagi ba program keterubah iya diatur nya.