10 iku pelajar SK Nanga Aman ditagit bulih semua A dalam UPSR 2014, ku Jefferson
KAPIT: Sekretari Politik ngagai Kepala Menteri Sarawak, Jefferson Jamit Unyat meri jaku tangkan ngagai semua nembiak primari enam ngasuh sida belajar enggau manah laban peresa UPSR enda lama agi iya nya kena 9 ngagai 11 September tu.
Jefferson ke mega mangku pengawa nyadi Mandal Chairman Komiti Pengatur Pengawa SK Nanga Aman udah bejadi pengawa nutup ‘Bulan Bimbingan Dan Kecemerlangan UPSR 2014 SK Nanga Amang’ ke diatur berengkah 5 Ogos nyentuk 5 September tu.
Berebak enggau nya iya meri jaku lalau ngagai bala nembiak primari enam ke sama udah bisi ngemujurka program nya.
“Mayuh amai utai ngasuh kitai mujur dalam pengawa sekula. Ambika chunto, kitai enda tau enda mendingka jaku ajar bala pengajar, ngembuan ulah ke manah, bebasa ke apai indai sereta diri sama diri, belajar bebendar, ransing penemu maya belajar sereta semampai besedia nyaut semua tanya ke bisi diberi pengajar tauka tanya ke bisi dalam bup,” ku iya.
Jefferson mega ngelalau bala apai indai nembiak ba sekula nya sentang pemesai reti enti kitai ngembuan pemandai dalam pengawa sekula. Ari pemujur besekula meh kita tau ngemansang sereta ngemansangka diri empu enggau diri bilik.
Kepala Pengajar sekula nya madahka bisi seratus iku nembiak sekula primari enam sekula nya deka ngambi peresa UPSR enda lama agi.
“Semua perengka sekula baka mija, bangku enggau bilik kelas ke deka dikena udah sedia magang. Kira 10 iku nembiak primari enam ke deka ngambi peresa UPSR tu udah ditagit bulih semua A ba semua mata pelajar enggau 72 peratus pas enggau gred A, B tauka C sereta GPS (Gred Purata Sekula) 2.27”, ku iya.
“Sepemanjai program ‘Bulan Bimbingan Dan Kecemerlangan UPSR 2014 SK Nanga Amang’ ke bisi diatur berengkah 5 Ogos nyentuk 5 September, mayuh pengawa udah dipejalaika.
Entara aktiviti ke bisi diatur baka sembiang, mendingka jaku lalau enggau penau sereta pengelandik ke dikembuan sekeda raban pengajar ke chukup landik ba seiti-seiti mata pelajar, belajar kediri, tiga kali peresa sereta mega bisi ngatur lumba enggau main dikena meri sukung ngagai bala nembiak awakka semampai ransing penemu”, ku John Lang.
Nembiak ke nunjukka pemujur dalam program nya bisi diberi perais. Sida ke mujur iya nya Stephanie Dunggat, Crespo Lianlisut, Terry Belikau, Connielia Fiffy, Felicia Bennet, Kelly Johadi, Gabriel Harman, Zackheus Chengai, Desmond Eddy, enggau Arnoldson Roland.
Sama bisi datai, kaban pengatur pengawa Edward Manggah enggau Chairman PTA, Tuai Rumah Achan Inang.