Kelala pengering sereta tetapka kuing diri
Ngambika bala nembiak ulih besemekih sereta bulih pemujur ba pengawa belajar sida
KUCHING: Nembiak sekula patut nemu pengering diri empu ba pekara pelajar ngambika pejalai sida ba pengawa nya jemah tau nempa pemujur, ku Chairlady Serakup Indu Dayak Sarawak (SIDS) Dato Sri Empiang Jabu.
Empiang netapka diatu raban nembiak sekula tau milih sekalika deka nampung pelajar akedemik tauka ngalih, ngulihka pengelandik ba pekara teknikal.
“Asaika pengering diri, sekalika nuan rinduka mata pelajar ke bekaul enggau pelajar akedemik tauka pelajar teknikal.
“Diatu, perintah bebendar ngansak raban nembiak sekula ngambi pelajar teknikal laban Sarawak diatu udah netapka juluk deka nyadi menua industri manggai ba taun 2030.
“Kitai patut mansang ba industri lalu pemandai sereta pengelandik ba pekara teknikal diguna kena nyapai juluk nya.
“
Asaika pengering diri, sekalika nuan rinduka mata pelajar ke bekaul enggau
” pelajar akedemik tauka pelajar teknikal. Dato Sri Empiang Jabu Chairlady Serakup Indu Dayak Sarawak
“Raban nembiak patut nyendiaka diri besemekih ngerebut peluang gawa ti bisi disediaka, tang enti ngasaika diri ulih nangkup sereta rinduka pelajar akedemik, pajakka aja. Nya meh kebuah kami SIDS nyendia perais peransang sekula,” ku iya.
Iya mansutka jaku tu ba Pengerami Meri Perais Peransang Nembiak Nyulut 2013 ( Wang Turu) SIDS ditu, kemari.
Ba pengerami nya, Empiang ngansak nembiak sekula seruran ngemeratka pengawa pelajar lebih agi ari pekara bukai.
Ku iya, pelajar pengawa ke pemadu beguna laban kitai Iban nadai mayuh ke ngembuan puku besai enti dibandingka enggau menyadi kitai bansa bukai.
“Kita anang enda mansang lalu rinduka pengawa sekula laban pengelandik teknikal sebengkah agi pekara ti tau dipelajar enti kita enda mujur nampung pelajar ba universiti,” ku iya.
Ngenang kaul ke sama, Sekretari SIDS Datin Senorita Linang ba jaku pengelalu madahka pengawa meri perais peransang diatur ninting taun kenyau ari 15 taun ke udah.
Ku iya, perais nya dikearap ulih meransang raban nembiak bulih pemujur ke besai agi ba pengawa sekula lalu nampung pelajar sida ngagai tikas ke tinggi agi.
“Jaku puji mega dituju ngagai bala apai indai ti udah bebendar nyengula sereta nyukung pengawa besekula anak sida.
“Pemeri dikena meransang sida belajar bebendar agi ngambika datai ba tikas ke tinggi,” ku iya.
Bisi 28 iku nembiak sekula anak serakup nya ti mujur ba peresa UPSR, PMR, SPM enggau STPM 2013 udah nerima setipikit sereta perais peransang ke disuaka Empiang.