Raban SIDS diperansang besaup ngatur pengawa
KUCHING: Chairlady Serakup Indu Dayak Sarawak (SIDS) Dato Sri Empiang Jabu meransang semua komiti di 24 buah pampang begempung ngemujurka pengawa ke bisi diatur serakup nya.
Ketegal pangku pengawa serakup ti majak nambah, iya minta komiti meri sukung sereta tulung ngagai SIDS pampang Kuching enggau Siol Kandis.
“Raban serakup ba Indu Opis, pampang Kuching, Siol Kandis sereta ke bukai balat kiruh diatu. Mayuh macham pengawa ditangkup SIDS ngelama ke udah lalu kitai mega bisi enggau ba pengawa bebaris Hari Malaysia ti deka datai tu ila.
“Kelimpah ari nya, SIDS mega ngaul diri ba sekeda worksyop, licha enggau pengawa bukai lalu tu semua begunaka tulung ari semua komiti. Kami beguna mayuh pengari ngereja pengawa SIDS,” ku iya.
Iya mansutka jaku tu ba Pengerami Meri Perais Peransang Nembiak Nyulut 2013 SIDS ke diatur di sebuah hotel ditu, kemari.
Nambahka nya, iya madahka SIDS pampang Betong deka ngintu genap 25 taun penumbuh pampang nya kenak 27 September tu, lalu dalam bulan Oktober ke deka datai tu SIDS mega deka ngatur seminar di Sibu.
Nengah awak nya mega, iya mega ngansak mayuh agi raban nembiak indu ngaul diri enggau SIDS.
Ku iya, raban nembiak baru diguna ngambika ulih ngembing SIDS jemah pengudah sida ke lama nyurut kediri.
“Kami ke tuai enggau naka ulih deka ngiring sida ke biak lalu sida ke biak mega tau bekunsi penemu sida enggau kami ke tuai,” ku iya.
Bela bisi ngulu pengerami nya Sekretari SIDS ke mega Penyanding Penemu SIDS Pampang Kuching, Datin Senorita Linang.