SDNU ngaga dua iti ripot polis pasal FB JIM-Jemaah ISIS, laman Facebook ‘Biawak Kenak Ulser’

KUCHING: Gerempung Dayak Sarawak (SDNU) minta polis jampat agi mansik orang ke ngempu Facebook ti mantaika penerang ti bedengkika bansa bukai sereta ngachuk runding raban bansa Dayak.

Mandal Presiden Gerempung Dayak Sarawak (SDNU) Anthony Banyan madah, nya patut nyadika lalau ngambika nadai agi orang ti mantai tauka ngenang pekara ti tau ngeringatka bansa bukai, jalai pengarap enggau adat enggau main asal di menua ke diuan mayuh bengkah pupu bansa.

“Kami minta polis ngemeratka pekara tu sereta ngeyampatka agi (pansik) ngambika pekara ti baka tu enda nyadi baru,” pia ku iya madah ngagai pengarang berita pengudah ngaga ripot di Balai Polis Sg Maong ditu, kemari.

Iya ngeriput ngaga polis pasal Jemaah ISIS Malaysia, ngarika Indu opis SDNU, kelimpah ari SDNU pampang Kota Samarahan, Demak Laut, Semerah Padi enggau BDC Stutong.

Sebedau tu, beberapa buah gerempung ukai dikuasa perintah ( NGO) Dayak bukai mega udah ngaga riput pasal JIM.

Ku iya, penerang nya ngerembai dalam Facebook ke ulih ngeruga penyerakup rayat di Semenanjung Malaysia enggau rayat ari Sabah enggau Sarawak.

SDNU sereta Sarakup Indu Dayak Sarawak (SIDS) berebak enggau nya sama ngaga riput polis pasal laman Facebook ‘Biawak Kenak Ulser’ ti meri penerang ke ulih ngeruga runding sereta ngeringatka raban bansa Dayak.

“Lebuh orang nyebut Dayak, nya ukai semina kitai di Sarawak aja ngasaika nya tang Dayak di Kalimantan mega sama ngasaika penerang nya,” ku iya.