Anang nunda orang ke pabu penemu: KM
Kitai Sarawak endang bepegai tegut ngagai konsep penyerakup enggau kaul ke manah
BINTULU: Kaul ke manah entara semua pupu raban bansa ke endang lama udah dipegai rayat di menua tu lalu patut seruran dipegai dikena ngelaungka penyarut ke dibai sekeda mensia ke pabu penemu.
Kepala Menteri Tan Sri Datuk Amar Adenan Satem madah, di Sarawak jarang nyadi penyarut tauka laya baka ba sekeda endur di menua tu sampai ngujungka rayat seruran beserekang penemu sereta enggai meda pangan diri.
Ku iya, Sarawak endang bepegai tegut ngagai konsep penyerakup enggau kaul ke manah sereta enda nerima sebarang ulah ke enda menuku kelebih agi ulah ke seruran ngenataika penyarut entara pupu raban bansa ke bisi di menua tu.
“Kitai sigi enda mudah belaya baka bansa bukai, tang bisi sekeda orang mimit- mimit lalu deka belaya. Kitai di nengeri Sarawak sigi enda belaya ngapa. Nengeri tu chukup semua utai nyengkaum adat enggau basa ti meruan,” ku iya.
“
Kitai sigi enda mudah belaya baka bansa bukai, tang bisi sekeda orang mimit-mimit lalu deka belaya. Kitai di nengeri Sarawak sigi enda belaya ngapa. Nengeri tu chukup semua utai nyengkaum adat enggau basa ti
” meruan. Tan Sri Datuk Amar Adenan Satem Kepala Menteri Sarawak
Nya alai, Kepala Menteri mega bisi meri jaku lalau iya ngagai rayat awakka enda muda mansutka jaku enda manah ngagai bansa bukai ke bisi di nengeri tu.
“Anang sesekali bejaku madah, nuan urang China pulai agai menua China, nuan orang India pulai ngagai menua India, nuan orang Melayu pulai ngagai menua Indonesia. Anang bejaku baka nya. Laban jaku munyi nya enda manah,” ku iya.
“Sarawak tu diempu semua kitai. Anang sesekali belaya baka orang bukai. Pasal pengarap pan deka belaya.
“Nuan Kristian, Buddha, Islam, pemilih diri ( megai enggau milih). Nadai guna belaya,” ku iya seraya meri jamin ngagai semua bansa di nengeri tu ulih milih sereta bejalaika pengarap sida enggau ati ti lantang sereta nadai penanggul ti nyeruga.
Adenan mansutka jaku nya lebuh ti bejaku ba pengawa bejadi ‘ Karnival Tanglung Bintulu’ enggau ‘ Maju Sarawak Run’ ke diseretai 2,200 iku mensia di Dataran Esplaned malam kemari.
Nambahka nya, festival tanglung ke bisi diatur nya deka nyungkak nama Bintulu dalam peta dunya, Malaysia enggau dagang temuai.
Ku iya, enda patut Bintulu semina dikelala kitai nyadi sebagi ari palan ngeluarka minyak enggau gis aja, tang menua tu mega bisi ngembuan mayuh macham pemanah sereta pengaya ke bukai.
“Anang semina ngumbai Bintulu bisi ngembuan minyak enggau gis ke mayuh, tang kitai mega deka meda pemayuh mensia ke manah sereta mereti ulah makin nambah ba Bintulu ditu,” ku iya.
Perintah nengeri Sarawak deka semampai meri sukung enggau bantu dikena ngatur ‘pesta tanglung’ awakka ulih diatur ninting taun dikena narit mayuh agi mensia datai ke Bintulu kelebih agi orang datai ari menua bukai.
“Enti di Kuching enggau Baram bisi diatur regata sereta Miri diatur festival Jazz, nyadi Bintulu ukai semina kaya enggau minyak sereta gis aja tang Bintulu mega diberi awak ngatur festival tanglung,” ku iya.
Bekaul enggau perambu ke deka nikika royalti minyak nengeri tu, Adenan madah ka iya benung nguji minta nambahka royalti minyak enggau gis ungkup nengeri Sarawak.
Ku iya, kitai sama bela nemu minyak enggau gis ke bisi di kandang tasik Bintulu enggau Sarawak sigi mayuh. Kitai enggai semina bekerendut tubuh meda mata aja, tang kitai deka sama bekunsi ke pemisi sereta asil nya dikena nambahka penatai pemisi nengeri tu.
“Diatu kitai benung be- runding enggau Petronas baka ni chara sereta jalai kitai ulih nambahka penatai pemisi nengeri Sarawak tang mesti bisi sukung ke chukup kuat ari semua bansa di nengeri tu,” ku iya.
Ku iya, aku bejanji deka nguji ngiga mayuh agi pun penatai pemisi ngagai rayat di nengeri Sarawak. Nya kebuah aku berunding enggau Petronas enggau Perintah Besai.
“Aku enda peduli ari ni penatai minyak enggau gas, Terenggau, Kelantan tauka Sabah? Tang enti bisi besangkut paut enggau Sarawak, aku deka bejalaika tanggung pengawa aku ke nyadi Kepala Menteri ngagai semua rayat di nengeri tu,” ku iya.
Sama bisi datai, bini Kepala Menteri, Puan Sri Datuk Jamilah Anu, Kaban Parli- men Bintulu, Datuk Seri Tiong King Sing, Menteri Muda Rengka Rama ( Elektrik enggau Penyambung) ke mega nyadi Menteri Muda Pemansang Raban Nembiak ( Menua Pesisir) sereta Kaban Kunsil Nengeri Kemena, Datuk Dr Stephen Rundi Utom.
Presiden Serakup Gerempng China Malaysia, Tan Sri Datuk Sri Pheng Yin Huah, Presiden Serakup Gerempng China Berejista ( FORCA) Bintulu enggau Sarawak, Dr Wong Aik Loung; Residen Bintulu, Muhamad Yakup Kari; Ketuai Menijar Opis Pemansang Bintulu ( BDA), Datu Mohidin Ishak enggau Sepunsa Besai ` Maju Sarawak Run’, Temenggung Barry Yek Siew Hui, Bala tuai raban bansa enggau bala pemesai ke bukai.