Liwan: Jaku Iban agi napi pemar ari sukut ngerembaika penemu enggau penerang
SIBU: Enda ulih dikenggai jaku Iban diatu napi pemar ari sukut ngerembaika penemu enggau penerang, ku Menteri Muda Main Asal enggau Adat Lama Liwan Lagang.
Iya madah pemansang penemu dalam mayuh bengkah bidang kelebih agi baka teknologi pemadah (IT) ngujungka jaku sebagi ari guna nya.
“Tang, enti deka nyadi sebengkah jaku ke mayuh guna, kitai enda ulih ngelarika diri ari minjau enggau ngauk jaku bukai.
“Ba pengagit kitai ke ngauk enggau minjau jaku bukai laban ke enda tau enda dikena, tentuka penulin enggau penalam jaku kitai empu terus dijaga,” ku iya.
Liwan madah munyi nya dalam teks iya ke dibacha Sekretari Politik ngagai Kepala Menteri Dr Richard Wil Uban maya Pengerami Ngetuka Simposium Bahasa Iban enggau Sastera Iban ditu, kemari.
Bela bisi datai Direktor IPG Kampus Rajang Raymond Gai Panting enggau Presiden Gerempung Pemansang Pelajar Jaku Iban (AEDIL) Dr Lambat Lindong.
Simposium dua hari nya diatur Palan Pematih Pengajar ( IPG) Kampus Rajang begulai enggau AEDIL lalu digulu lebih kurang 200 pesereta nyengkaum bala pemesai ari opis pelajar, pengajar, pengelicha enggau pelajar IPG Kampus Rajang.
Liwan ti mega nyadi Kaban Kunsil Nengeri ( ADUN) Belaga madah, menua Jipun, Korea, Peranchis, Jerman enggau sekeda menua bukai udah maju bepelasarka penau jaku sida ke nyadi jaku ke chukup kering sereta tegap dikena dalam bidang pelajar.
“Sida udah mujur ngetanka penegap jaku diri empu lalu nempa jaku sida nyadi jaku ke dikena dalam bidang Sains enggau Teknologi, jaku ba librari enggau mayuh penemu ke bukai.
“Nya alai, menua-menua nya nyadi peransang tauka chuan teladan ngagai kitai nyaga penulin jaku diri empu ukai nagang jaku kitai dikemansang,” ku iya.
Nangkan ke nya, ba penemu iya endang udah nyadi tanggung pengawa bala pesereta simposium nya nyadi ejen pemansang nyaup ngerembaika jaku Iban awakka mengkang diguna dalam bidang pelajar kelimpah besaup napi pemar dudi hari enggau chara profesional.
Dikena ngerembai enggau ngangkatka jaku Iban setipak enggau jaku bansa bukai, Liwan madah pengawa nya patut dikereja besaup sereta belabuh ari diatu.
Ba pekara tu, sistem pelajar endang nyadi pelasar ke pemadu manah dikena ngambuh serak ke diatu ngenegapka jaku, ku iya.