18 iti resolusyen mujur dijapai nengah simposium dikena ngangkatka Jaku Iban

SIBU: Bisi 18 iti resolusyen ari tiga iti keretas pengawa ke dipejuraika udah mujur dijapai maya Simposium Bahasa Iban enggau Sastera Iban ke sekali tu.

Presiden Gerempung Pemansang Pelajar Jaku Iban (AEDIL) Dr Lambat Lindong madah, resolusyen nya deka dipansik bala perintah sebedau diguna bala ke bukai dikena ngemansangka jaku Iban enggau manah agi.

“Sepemanjai dua hari simposium tu, kitai udah mujur bulih resolusyen ke ulih nulung sereta mantu ngangkatka jaku Iban di nengeri tu.

“Sukung ke chukup tegap ari sida ke mangku tanggung pengawa ngemansangka jaku Iban tu dikearapka ulih netapka resolusyen tu awakka iya diberi pemendar sereta ulih diguna ba sukut pelajar di nengeri tu dikena ngemansangka jaku Iban,” ku iya.

Iya mansutka jaku nya lebuh ti macha sekeda resolusi maya Pengawa Ngetuka Simposium Bahasa Iban enggau Sastera Iban ke diatur ba sebengkah hotel tebilang ditu, kemari.

Nangkan ke nya, Dr Lambat madah enggau pemujur bulih resolusyen nya, iya ngarapka resolusyen nya ulih nulung ngemansangka jaku Iban di nengeri tu.

“Resolusyen tu deka diberi ngagai Raymond lalu minta iya mansik sereta meratika enggau silik pemanah sereta guna resolusyen nya sebedau diberi ngagai Sapit Kepala Menteri Datuk Patinggi Tan Sri Alfred Jabu sekali ke ulih dikena tauka enda.

“Barang ko sida iya mansik sereta meri pemutus runding sida bekaul enggau resolusyen kitai tu,” ku iya.

Tuju ke bendar resolusyen nya, ku iya, dikena nyungkak ke agi guna sereta chara nguna jaku Iban nyentuk ngagai tikas ke pemadu tinggi, lalu ulih ngenanka jaku nya ari ke punas.

Tiga iti keretas jurai ke bisi dibantai sepemanjai simposium tu diberi nama ‘Alternatif Hala Tuju Bahasa Iban’ ke dipejuraika Dr Chemaline Usup, ‘Cabaran Sastera Iban Dalam Masyarakat Iban dan Pendidikan Kebangsaan’ (Dr Robert Menua Salleh) enggau ‘Perkembangan Bahasa Iban’ (Profesor Madya Dr Neilson Ilan Mersat).