Regatta Sarawak alai ngayanka pengeraja enggau pesaka asal
KUCHING: Bepuluh ribu iku mensia bisi datai ke nyengkaum temuai ari menua luar kelimpah peranak Sarawak datai ngemataka pengerami asal iya nya Regatta Sarawak 2014 sereta Regatta Perau Naga Antarabansa 2014, ti diatur ba Waterfront Kuching.
Regatta Sarawak 2014 berengkah diatur 4 nyentuk 7 Spetember ti ngena rambai jaku ‘The Race for Harmony’, lalu udah dipenyadi Kepala Menteri Tan Sri Datuk Amar Adenan Satem kemari ( 6 September).
Nitihka sejarah enggau cherita asal ti nyemetak Regatta Sarawak berengkah diatur dalam taun 1872 iya nya maya jeman Rajah Charles Brooke nyentuk ke seharitu.
Regatta Sarawak ukai semina ngembuan sejarah ti nyelai, tang mega ngembuan pemanah ke diri empu, kelimpah diterima nyadi sebengkah pengerami ti mujur nempa penyerakup enggau ngerapitka kaul pupu bansa di nengeri tu.
Lumba tu dikena ngingatka baru jeman pengerami belumba perau panjai enggau perau naga ke kala dipejalaika jeman Brooke kelia, kelimpah ari mayuh macham pekit enggau main asal diatur nyerumba Regatta Sarawak, nyentukka diatu.
Entara lumba perau ke dipekitka ba Regatta Sarawak 2014 baka perau Balok 7 Pengkayuh Lelaki, Bidar ( 10, 15, 20, 30) Pekayuh Lelaki, Kayak Perseorangan Lelaki, Kenyalang Tebuka Lelaki, Tambang Berdayung, Kayak Bergu Wanita enggau ke bukai.
Senipak enggau juluk perintah nengeri deka ngangkatka Regatta Sarawak nyadi penegerami renggat antarabansa, seiti pengerami baru diberi kelala iya nya Lumba Perau Naga Antarabansa.
Bisi 11 menua enggau 550 iku pesereta nyereta Lumba Perau Naga Antarabansa ke sekali tu iya nya Australia, Kanada, Hong Kong, Macau, Brunei, Singapore, Filipina, Thailand, Taiwan, Indonesia enggau Malaysia.
Tetiap taun nyerumba Regatta Sarawak mayuh program bukai bisi diatur, ambika banding taun tu senipak enggau Taun Nemuai Malaysia enggau Taun Nemuai Sarawak, Opis Menteri Dagang Temuai ti nyadi pengatur pengerami bisi nyelitka program bukai.
Entara program diatur nyerumba Regatta Sarawak 2014 ti nyengkaum Promosi Kraf Malaysia 2014 (Opis Pemansang Krafjari Malay- sia), Pengawa Mandangka Pemakai enggau Asil Pengelandik Jari Malaysia (Unit Pemansang Dagang Bumiputera enggau FAMA), Pekit Gendang Melayu Sarawak ( Opis Main Asal enggau Pengawa Seni) enggau East Asia Inter-Region Tourism Forum (EATOF) Food Festival (Opis Menteri Dagang Temuai Sarawak).
Dua tiga taun ke udah sereta ketegal ti udah dipasukka dalam kalender dagang temuai, pengerami Regatta Sarawak sebengkah ari chara dikena matak temuai datai ke Sarawak kelimpah ari bala pesereta Regatta.
Regatta Sarawak sebengkah pengerami ke dikelakuka dalam kalender Taun Nemuai Malaysia 2014 enggau Taun Nemuai Sarawak 2014.
Nitih penerang ari Menteri Dagang Temuai Datuk Amar Abang Johari Tun Openg ba jaku pengelalu iya ke ditulis ba bup pengerami Regatta Sarawak 2014, iya madahka atur pengerami Regatta Sarawak senipak enggau juluk Opis Menteri Dagang Temuai Sarawak dikena ngerembaika industri dagang temuai ngagai temuai ari serata dunya.
Iya ngarapka nengah pemujur pengerami Regatta Sarawak 2014, nengeri tu deka dipilih nyadi palan endur nemuai.
“Nengah mayuh macham program ke diatur renggat nengeri enggau antarabansa, tetiap taun Sarawak nerima penatai temuai ke mayuh sereta majak nambah iya nya ba taun 2011 bisi 3.795 juta iku, taun 2011 bisi 4.069 juta iku (2012) enggau bisi 4.371 juta iku ba taun 2013.
“Regatta Sarawak penarit temuai kedua pemadu besai ba nengeri Sarawak pengudah Rainforest World Music Festival.
“Asal pengerami Regatta diberikelala maya jeman Rajah Brooke ti ngujungka Regatta Sarawak nyelai sereta kaya enggau sejarah ari kelia nyentukka diatu.
“Ke narit ati sereta ditemegahka rayat Sarawak ba pengerami Regatta tu iya nya lumba perau ti berebutka Menteri,Puan Sri Datuk Jamilah Anu, Menteri Pemansang Rama Tan Sri William Mawan Ikon, Menteri Perengka Guna Mensia Mayuh Datuk Amar Awang Tengah Ali Hasan enggau ke bukai.