‘Ais Krim Goyang’ bedau tebilang tang udah bisi peminta
KUCHING: ‘ Ais Krim Goyang’ nama ti nyelai, kreatif sereta narit ati mensia mayuh ti deka nemu baka ni gaya sereta chara ais krim nya digaga.
Di Sarawak, ‘Ais Krim Goyang’ nya bedau tebilang taja pan baru ngerembai enti dibandingka enggau di Semanjung Malaysia ke endang lama udah tebilang.
Nitihku Abdul Rahman, 33, ti udah berangkah pun taun tu tadi bejualka ‘Ais Krim Goyang’ madahka kereban ti dikena iya ngaga nya dibeli, ke alai teknologi nya datai ari menua Thailand.
Ku iya ais krim nya bedau ulih dikerembai, dipelabaka ketegal nadai peminta enggau markit di nengeri tu.
“Setipak enggau nama iya ‘Ais Krim Goyang’, ais krim tu digaga dalam mesin tauka kereban ke ngena teknologi ari menua Thailand ti semina digusak ngelama 15 minit aja, ngambika ulih nyadi ais krim.
“Nama ‘Ais Krim Goyang’ endang asal ari pemekal din, semua kami ti bejual setuju ngena nama nya.
“Ais krim tu agi baru ba menua kitai taja pan udah bisi ditu tang bedau dikomersil, nangika nadai peminta.
“Tang naka ke diatu, aku semina ngereja pengawa tu nyambil dikena ngisi maya lepa ujung minggu laban aku ngasaika ‘Ais Krim Goyang’ tu bisi peminta ke mayuh,” ku iya lebuh dikerandau Utusan Borneo seraya madah peluang ‘Ais Krim Goyang’ dalam industri pemakai ila endang besai.
Ku iya, ‘Ais Krim Goyang’ ke dijual iya mayuh asai baka jagung, coklat, vanilla blue mint, strawberry, 3 lapis enggau 2 lapis.
Nambahka nya, lebuh ditanya sentang enggau mudal ke dikena iya muka dagang nya, iya madahka nadai begunaka belanja ti ke lalu besai.
“Puku aku ngepun tu suba enda besai iya nya urung RM1,000 lalu urung seminggu udah bejual udah mulaika puku nya baru.
“Dalam sekali ngusak ngelama 15 minit ulih ngaga 100 iti ais krim laban chuan dalam injin tu bisi 100 iti chuan, rega seiti ais krim iya nya RM1 nya, ke deka meri untung beresi urung 75 peratus,” ku iya.
Lebuh ditanya bakani iya bulih runding deka bejual ais krim nya, Abdul Rahman madah, ke bendar nya bepun ari semina rerindu ati aja maya ujung minggu tang beduduk ari peminta mayuh enggau peluang bulih untung, iya lalu ngereja nya nengah chara nyambil.
“Keterubah endar suba aku semina deka serindu ati aja dikena ngisi maya lepa ujung minggu tang kelelama nyau nyadi dagang. Maya ujung minggu aku suah bejual ba Pasir Panjang De’Curve din, seraya mai anak bini bemain ba pantai, aku ngiga belanja.
“Tang diatu aku udah bisi orang ke nyereta Festival Pemakai 2014, ke diatur nyerumba pengerami Regata Sarawak 2014 ke diatur kena 3 nyentuk ke 7 Ogos, ke nguji ngelakuka ‘Ais Krim Goyang’ nengah festival nya.
Ku iya, festival nya manah laban ulih mantu ngelakuka barang ti dijual ke lebih agi ngagai orang dagang baru ke baka iya.