Miri palan endur ngintu Hari M’sia taun tu

MIRI: Peranak menua di Miri dipinta ngitang menira Sarawak enggau Malaysia beserimbai enggau pengerami ngintu Hari Merdeka enggau Hari Malaysia.

Datuk Bandar Majlis Bandaraya Miri ( MBM) Lawrence Lai madah, bandaraya nya deka ngemeratka agi pengerami ngintu Hari Malaysia tikas nasional ke deka diatur kena 16 September tu ila.

“Ukai reti kitai enda ngintu Hari Merdeka kena 31 Ogos tu, tang kitai balat agi ngemeratka 16 September ( Hari Malaysia),” pia ku iya madah ngagai Utusan Borneo kemari lebuh ke ditanya sentang pengerami Hari Merdeka kena 31 Ogos tu.

Ku Lawrence, pengawa ngintu Hari Merdeka sekali tu diaturba Kapit ungkup tikas nengeri lalu atur pengawa ke besai agi deka diatur ba bandaraya tu kena 16 September ila.

“Ke lebih agi maya nya kitai lalu ngintu Hari Pengada Tuai Megai Menua ( TYT) kena 13 September,” pia ku iya.

Ku iya baru, semua orang diperansang ngitang menira nyengkaum ba bengunan opis perintah, komersil, peribit enggau di rumah endur diau.

Berebak enggau nya, pengawa ngintu Hari Malaysia di Miri deka dirami nengah sekeda program ke besai baka konsert sereta berami malam nyambut penatai Hari Malaysia.

Malam ti nangkanka nya, pengerami bukai mega bisi diatur sereta deka digulu Menteri Besai Datuk Seri Mohd Najib Tun Razak, Tuai Megai Menua ( TYT) Sarawak, Tun Pehin Seri Abdul Taib Mahmud enggau Kepala Menteri Sarawak Tan Sri Datuk Amar Adenan Satem.

“Konsert enggau pengerami malam nyambut penatai Hari Malaysia deka dipejalaika ba mua Imperial Palace Hotel lalu pengerami kena 16 September deka diatur ba Dataran Kipas Miri,” ku iya.