Sultan Hassanal Bolkiah entara temuai ti ngerichahka Lumba Perau Naga kemari
KUCHING: Lumba Perau Naga Antarabansa nyerumba Sarawak Regatta 2014 di Tebing Ai Kuching pagi kemari nerima temuai dipebasa, Sultan Brunei, Sultan Hassanal Bolkiah.
Sultan Hassanal Bolkiah disempulang Tuai Pemegai Menua (TYT) Tun Pehin Sri Abdul Taib Mahmud ngemata bengkah lumba ti keterubah iya dipekit lalu deka dipekit ninting taun.
Penyampau 20 tim nyengkaum 14 ari menua luar ngambi bagi ba lumba perau naga ti mujur matak 500 iku penyereta.
Tim ari menua luar ke bisi datai enggau bepekit iya nya Australia, Kanada, Hong Kong, Macau, Brunei (dua tim), Singapore (dua tim), Filipina (3 tim), Thailand, Taiwan enggau Indonesia.
Malaysia diarika 6 tim iya nya ari Sabah, Putra Jaya, Pulau Pinang, Kedah enggau Sarawak (dua tim).
Kepala Menteri Tan Sri Datuk Amar Adenan Satem, Sapit iya Datuk Patinggi Tan Sri Alfred Jabu, Sekretari Perintah Nengeri Tan Sri Mohd Morshidi Abdul Ghani enggau Menteri Da- gang Temuai bela bisi datai ngemataka lumba nya.
Pagi nya mega, Lumba ‘Khas’ VIP 1Km bisi diatur ke alai perau TYT Tun Pehin Sri Abdul Taib Mahmud, Cahaya Zen mujur teulihka penuduk lumur satu.
Penuduk lumur dua pulai ngagai perau Opis Kepala Menteri (Tan Sri James Masing) lalu ba penuduk lumur tiga diempu perau Petra Energy (Datuk Amar Awang Tengah).
Lapan buah perau bepekit ngerebut gelar Lumba ‘Khas’ VIP 1Km nya kemari.