Nansian tetap enda ngelepaska sitak Tasik Biru maya pengawa bepilih ila

BAU: Sapit Presiden Parti Tenaga Rakyat Sarawak (TERAS), Datuk Peter Nansian Ngusie madah, iya enda ngelepaska penuduk iya ba Dewan Undangan Negeri (DUN) N.2 Tasik Biru maya bepilih nengeri ti deka datai.

“Ngambika kitai sama bela nemu, perintah nengeri Sarawak diatu bejalaika pengawa megai menua enggau chara BN-Plus. Nya nunjukka TERAS agi mengkang dalam kabinet lalu sebagi ari Barisan Nasional (BN).

“Nya alai anang irau laban seiku aja pengari ari parti Barisan Nasional deka diberi awak bepilih ba sesebengkah endur tauka sitak maya pengawa bepilih ke deka datai.

Nansian mansutka jaku nya lebuh ti bejaku ba mua 800 iku orang nyengkaum ketuai enggau pengari rayat, nembiak lelaki enggau indu maya ‘ Majlis Pemimpin Bersama Rakyat N. 2 Tasik Biru’ di Pusat Komuniti Redeems, Singai ditu, malam kemari.

Kelimpah ari Nansian majlis nya mega bisi digulu Presiden TERAS Tan Sri William Mawan Ikom, Sapit Presiden Kanan Rosey Yunus, Sekretari Parti Datuk Sylvester Entri Muran sereta Tukang Wang Parti Paulus Palu Ngumbang.

Maya majlis nya, Nansian mega nerangka enggau silik ngagai rayat bekaul enggau parti TERAS kelebih agi rayat ke diau di pelilih menua Tasik Biru awakka sida enda agi irau bekaul enggau utai ke enda tentu betul dipadahka sekeda orang pasal parti baru nya.

“Bisi sekeda mensia ma- dahka TERAS tu ukai ari parti BN, tang enti kita berunding enggau dalam nama kebuah kami agi mengkang dalam kabinet? Nya nandaka kami endang sigi ari parti BN.

“Aku ngarapka enggau utai ke dipadahka aku tu kitai sama bela nemu nama utai ke dikumbai orang TERAS. Nya alai aku ngarapka kita anang agi irau enggau sida ke deka ngerusak kaul manah entara rayat enggau parti tu.

“Tuju ke bendar aku nerangka semua tu ukai laban aku ka ngiga munsuh, tang laban aku deka madah ngagai kita semua awakka enda agi irau sereta enda nemu utai ulu ili pasal utai ke nyadi entara parti TERAS enggau SPDP,” ku iya.

Kelimpah ari nya, ku Nansian ke mega nyadi Menteri Muda Pemansang Industri (Pemansang Industri Kebun Mit) enggau Menteri Muda Tanggung Pengawa Raban Bansa madah tuju majlis nya diatur dikena ngerapatka kaul ti manah entara bala pemesai enggau rayat kelimpah ari betukar runding sereta chara ngemansangka nengeri tu dikena ngenataika pemujur ti meri pengelikun ngagai rayat.