Raban Nembiak SUPP diperansang besaup ngereja pengawa
KUCHING: Raban Nembiak Parti Sa’ati Rayat Sarawak ( SUPP) dilalau besaup negapka parti ngambika parti nya mengkang diguna.
Presiden iya Tan Sri Peter Chin madah tanggung pengawa Raban Nembiak endang berat, lalu iya ngelalau sida seruran ngabas rayat, betanyaka timbal pasal parti.
“Kelimpah ari nya tanyaka kebuah kitai enda ulih menang, kelimpah nanya penemu sida ( komuniti) bakani chara kitai ngulihka mayuh undi sereta ngambi pulai kerusi di Kuching, Bintangor, Sibu, Miri enggau Bintulu,” ku iya.
Iya madah munyi nya lebuh bejaku ba atur pengawa bejadika Aum Tiga Taun Sekali Raban Nembiak SUPP ke-15 di sebengkah hotel ditu, kemari.
Ku iya, taja pan parti enda tegap baka suba, tang bala nembiak patut bebendar sereta besaup ngereja pengawa.
“Pekara tu bekait enggau pemendar gawa enggau meri awak ngagai parti,” ku iya.
Chin madah enti raban nembiak gawa belajar nyadi ketuai dalam parti, sida pa- tut ngemeratka parti sereta ngembingka kaban ke bukai.
“Taja pia, tu ukai reti kitai mejal orang nitihka penemu kitai tang laban kitai kiruhka pendiau rayat.
“Enti sekali orang udah nemu pemanah ulah kitai nyadi ketuai, ila lusa pemanah enggau penemu kitai tetap diguna dalam parti,” ku iya lalu meransang tiap iku Raban Nembiak besabar dalam parti.
Iya madah parti SUPP kenyau maya iya ditumbuh ngembuan chara bejalaika parti ngena chara ke lama.
“Tang, kekadang chara lama tu manah agi, nyangka enda sebaka enggau penemu nembiak, tang ke berat, visi kitai agi mengkang sebaka, lalu kitai bekunsika visi nya ngiring parti ungkup komuniti.
“Kitai enggai belaya dalam parti…laban nadai meri penguntung ngagai parti. Semina mechahka kitai,” ku iya.
Chin madah, pengelama iya udah nyadi presiden parti (dua taun Semilan bulan), ketegal penanggul ke ditapi enggau Opis Pengerejista Gerempung (ROS) enggau sekeda penanggul bukai, kelimpah ditambah enggau semekih ari United People’s Party (UPP), iya madahka diri minta ampun ngagai semua kaban parti.
“Enti nitih, aku patut mayuh agi awak begulai enggau kita, ngiring, ngembing kita ngambika kitai sama bulih penemu, tang CWC enggau aku empu kiruh negapka parti ari dikinsil, nya ke pengabis berat ditapi enggau penanggul dalam timpuh aku nyadi presiden,” ku iya.