Tan Kai dipadu baru nyadi Ketuai Raban Nembiak SUPP
KUCHING: Tan Kai menang nadai orang ngelaban lalu ngujungka dipadu baru nyadi Ketuai Raban Nembiak Parti Sa’ati Rayat Sarawak ( SUPP) rambau Aum Tiga Taun Sekali Raban Nembiak SUPP ke-15, ditu kemari.
Maya aum media pengudah pemutus nya, Tan Kai madahka diri seruran deka ngemeratka penyerakup dalam parti SUPP.
“Enti nadai penyerakup, nadai guna kitai bejaku pasal tuju tauka kuing parti. Nya alai, genap kitai enda tau enda ngemeratka peyerakup,” ku iya.
Nangkan ke nya iya madah rintai nama raban nembiak ke sekali tu semua sitak bisi pengari ke diri empu.
“Aku enda ulih ngelantangka ati semua pampang. Bisi sekeda pampang parti enda mayuh tubuh tang enda ulih disengkaum semua laban pangku pengawa ke enda mayuh.
Aku mega nemu kami enda ulih nyulut 100 peratus, tang kami deka ngaga pengawa ke pengabis manah ungkup parti,” ku iya seraya madah semua sida ke dipilih nya, orang teleba ngereja pengawa ngelama tu.
Semua pampang SUPP di Sarawak bisi 28 buah, lalu orang ke mangku pengawa nyadi ketuai raban nembiak SUPP meseti berumur enda ngelui 45 taun.
“Udah tu, aku deka ngelawa semua pampang parti ke bisi raban nembiak,” ku iya.
Penuduk bukai kelimpah ari Tan Kai mangku pengawa nyadi Sapit Chairman Raban Nembiak iya nya, Ong Chee Yee enggau Tang Kieh Ming, Sekretari Besai (Teng Ung Woo), Sapit Sekretari ( Gregory Tan), Tukang Wang (Mock Chuan Ping), Pemadah enggau Sekretari Pemadah (Milton Foo).
Aum Besai Tiga Taun Sekali (TGM) Parti Sa’ati Rayat Sarawak ( SUPP) berengkah ari 8 nyentuk 9 September, lalu Menteri Besai Datuk Seri Najib Tun Razak dijangka datai bejadi hari penudi pengawa tu.