Tiong minta opis menteri numbuhka formula pasal IP
BINTULU: Kaban Parlimen Bintulu, Dato’ Seri Tiong King Sing minta opis menteri tauka ejensi ke bekaul numbuhka sebengkah formula dikena nyeliahka ejen Reta Tengkira ( IP) minta bayar ari genap palan ke bisi ngasilka karya, lagu enggau utai bukai ke nempa produk diri empu.
Iya madahka diri nyukung penemu ke dipansutka Menteri ba Opis Menteri Besai, Datuk Dr Wee Ka Siong dalam sebengkah surat kabar menua tu ke ngasuh peminta bayar ungkup hak nengkebang patut dikemanahka agi laban undang-undang enda kala bulih pemendar.
“Endang utai ke patut nyema genap pemenggi IP nyengkaum sida penengkebang leka lagu, artis rikoding enggau utai bukai nerima bayar royalti asil ari pengawa ke digaga sida, tang utai tu enda kala bulih pemendar endur sida minta bayar ari kedai makai, kerita suwa, palan bebeli barang enggau endur bukai ke bisi nebah lagu tauka asil karya sida,” ku iya rambau aum pengarang berita ke diatu ditu kemari.
Iya madah, sebengkah formula patut ditumbuh ungkup semua taukey palan pemerindang kelebih agi ke mayuh nguna layu ke ditempa bala artis ba menua tu sentang chara ke patut endur sida minta bayar baka royalti ungkup tiap iku artis lalu ukai minta bayar ari kedai-kedai ke nebah lagu ke semina dikena ngerichahka kedai diri empu aja.
Berebak enggau nya, Tiong minta Opis Menteri Dalam Menua (KDN), Opis Dagang Dalam Menua, eng- gau Pekara Bebeli Barang (PDNKK) sereta ejensi ke bekaul ti bukai bejalaika pansik silik sentang isu tu dikena nyeliahka pekara nya ngenusah taukey palan dagang ke nebah muzik enggau lagu ba kedia diri empu ngambika sida enda dipinta bebayar sepeneka orang minta.
“Bayar royalti endang utai ke suah diterima raban pemenggi IP, tang aku nadai ngasaika pengawa mupu bayar ari kedai-kedai dagang sebengkah utai ke dikemendar,” ku tandu iya.
Nama utai patut digaga pemenggi IP iya nya sida patut nemu ditu sida enda patut minta bayar ari dinidini kedai ke nadai ngena IP enggau tuju ke besai tauka ungkup pengawa dagang.
Nya alai, ku iya sebengkah formula tauka undang-undang patut ditumbuh dikena nyeliahka nyadi pengawa salah nguna IP endur sida minta bayar sereta enda patut dipupu ari dini-dini kedai ke bisi nebah lagu tauka asil karya sida.