Penyarut semina meri pengerugi ngagai rayat M’sia

KUCHING: Rayat dilalau nitihka jaku Menteri Besai Malaysia ke minta rayat beserakup lalu diau dalam pendiau ke likun lalu enda ulih dikachau raban sida ke mai penyarut ari menua luar.

Menteri Sumber Mensia, Datuk Sri Richard Riot Jaem madah pekara nya sigi udah ditulis dalam jaku silup Melayu ke nyebut ‘Bersatu kita teguh, Bercerai kita roboh’.

Iya madah, beserimbai enggau nya mega, setipak enggau pengawa perintah muka ekonomi menua tu ngambika orang ari menua luar tepaut ati beranakka puku ditu.

“Enti kitai enda segulai sejalai, nyau baka ke mai orang ari menua luar ngachau pengelikun sereta mechahka kitai. Ba penemu aku, penyarut nya semina mai pengerugi ngagai semua rayat Malaysia.

“Aram meh kitai seati, sereta beserakup. Maya taun 2015, Malaysia deka nyadi tuai rumah ngagai raban ASEAN ba juluk deka ngangkatka komuniti ASEAN.

“Pemayuh mensia di ASEAN bisi 600 juta enti dibanding enggau Amerika Syarikat ke semina bisi 300 juta iku mensia,” ku iya madah maya bejaku ba atur pengawa ngetuka ‘Fiesta Kebudayaan dan Tarian Tradisional’ ba Dewan Masyarakat Serian, ditu kemari.

Menua ASEAN mungkur Kemboja, Filipina, Indonesia, Laos, Malaysia, Myanmar enggau Singapore, Thailand, Vietnam sereta Brunei deka nyadi palan ke narit ati orang dagang ke beranakka puku ari menua luar dikena nyungkak pengerembai ekonomi.

Ngenang sentang program ke diatur nya, iya madah pekit main asal nya dipasuk 17 penyereta nyengkaum enam ari raban bansa Bidayuh, Melayu (4), Iban (2) enggau China (5).

Iya madah, atur pengawa bansa nya ulih neritka kaul enggau pangan diri nyengkaum kaul bilateral entara menua Sarawak enggau Kalimantan Barat.

Ba pengawa nya, Riot meri chek RM20,000 ke deka ditambah ngagai RM30,000 ari Opis Menteri Kandang Menua enggau Pemansang Komuniti ke udah ngatur program nya.