Sepital baru Sri Aman benung ditinda
SRI AMAN: Datuk Senator Profesor Dr Sim Kui Hian ngutuk ulah sekeda kaban gerempung ukai perintah (NGO) ditu ke suah ngemansutka penerang ke kurang nyengala lebih agi bekaul pengawa ngaga Sepital Sri Aman ke baru.
Iya madah, pengawa ngaga sepital baru ba renggat tinda, ukai semaya puang ungkup Pengawa Bepilih Besai Ke-13 (PRU13) baka ke didawa raban ke nadai betanggungjawap.
“Jam ke diatu, pengawa ngaga sepital nya agi ba renggat tinda. Iya tetap deka digaga lalu ukai nyadi isu ngagai rayat kitai ditu,”ku iya ti mega nyadi Sekretari Jeneral SUPP.
Iya madah munyi nya rambau bejadi Pengawa Makai Lemai Beserimbai enggau Pengerami Kuih Bulan ke diatur Komiti Nembiak enggau Indu, Parti Se’ati Rayat Sarawak (SUPP) Pampang Simanggang ba sebengkah restauran tebilang ditu, empai lama ke udah.
Dr Sim madah, penerang ke nadai betanggungjawap nya ngujungka rayat Sri Aman saru penemu sereta nyalahka Menteri besai eng- gau pengari rayat ditu.
“Menteri Besai udah madah deka ngaga sepital baru tu berenggat-renggat, ukai digaga tembu tekala nya.
“Nya alai, barang sapa piak ti ngemansutka penerang ke enda amat nya ba surat kabar menua tu sebedau tu patut ngembuan bukti ke chukup enggau penerang ke amat,” ku iya.
Nya alai, ku iya pengawa ngaga sepital nya deka beguna awak lalu rayat ditu patut besabar laban pengawa nya digaga nitihka atur.
Sama bisi datai Menteri Muda Pemansang Men- ua Pesisir enggau Pengawa Berumah ti mega nyadi Kaban Kunsil Negeri (ADUN) Simanggang sereta nyadi Chairman SUPP Simanggang Datuk Francis Harden Hollis, Chairman Komiti Indu Opis Besai SUPP Datin Jenifer Alice Chee, Penyanding Penemu SUPP Simanggang Temenggung Sii Toh Peng, Penyanding Penemu Komiti Nembiak SUPP Simanggang Kii King Hang enggau Patrick Michael, Chairman Komiti Indu SUPP Simanggang Ling Siew Hung sereta bala ke bukai.