PAWE deka ditumbuh ba semua sitak parlimen

MIRI: Opis Menteri Pemansang Orang Indu, Ruang Bilik enggau Raban Bansa (KPWKM) ngembuan juluk numbuhka Palan Aktiviti Orang Tuai ( PAWE) ba semua sitak Parlimen maya taun 2018 ila.

Menteri iya, Dato’ Sri Rohani Abdul Karim madah, naka ke diatu Opis Menteri Pengintu Pengelantang Pendiau (JKM) ke dikuasa KPWKM udah numbuhka kira 45 buah PAWE di serata menua nyengkaum tujuh di Sarawak iya nya Kuching, Sibu, Beladin, Tatau, Dalat, Lingga enggau Miri.

“Kitai nagaka kira 222 PAWE tauka lebih maya taun 2018 ila. PAWE ditumbuhka ba taun 2007, lalu iya meri penguntung ngagai 132, 942 iku orang tuai ba serata menua lalu udah nya PAWE Miri udah meri penguntung ngagai 83, 039 iku orang tuai.

“Penumbuh PAWE mega meri peluang ngagai orang tuai bejalaika mayuh bengkah program komuniti. Udah nya sida ulih terus begulai enggau diri sebilik dalam komuniti,” ku iya rambau bejadi Program PAWE Miri di Palan Aktiviti Orang Tuai Miri kemari.

Iya madah, dalam aktiviti PAWE meri awak ngagai orang tuai berandau sereta beteleba enggau pangan diri kelimpah nyeliahka orang tuai ngasaika diri nadai dikibuh, iya nya nyengkaum tusah ati, nangi enggau puang ditinggalka bala anak.

Nitihka rikut JKM, ba taun 2014, penyampau orang tuai ke bisi ngerejista diri ba PAWE di serata menua tu bisi 21, 489 iku lalu sida ke ke ngerejista diri ba PAWE Miri iya nya 12, 690 iku. Ditu meh penyampau pemadu mayuh orang tuai ngerejista diri ba entara palan PAWE di Malaysia.

“Nengah Program Muhibbah PAWE 2014 ke bisi diatur sehari tu (kemari), JKM nagaka penyampau bisi nambah nyentuk ujung taun tu iya nya 40,000 lalu kaban baru ke bisi ngerejista diri ba PAWE Miri rambau program sehari tu aja bisi 300 iku,” ku iya.

Nangkan ke nya, Program Muhibbah PAWE 2014 tu endang program keterubah iya diatur lalu tuju iya dikena meri peluang ngagai orang tuai ngedut kaul enggau mensia mayuh ke bukai sereta nempa pengasih entara pangan diri.

Entara program ke bisi diatur nyerumba program tu iya nya eksibisyen, ngerejista kaban PAWE, beperesa pengerai, pekit karaoke, lumba, pekit nyura, pekit pisin enggau kuiz.

“Orang tuai patut ngambi awak tu endur nempa PAWE nyadi palan aktiviti ke ulih nyeliahka sida ngasaika diri nadai dikibuh,” ku iya.

Bela bisi datai Ketuai Direktor Pengintu Pengelantang Pendiau Mensia Mayuh Dato’ Norani Mohd Hashim enggau Temenggong Elizabeth Deng.