Pengkalan Kpg Hilir, Selalang udah rusak
SARIKEI: ‘Enda likun sereta rusak’. Munyi nya meh sebana mensia mayuh bekaul enggau pangkalan besai ti enda jauh ari Kampung Hilir, Selalang, semak ditu.
Sebana nya dipansutka ngagai media, berindik ari gaya pengkalan nya ke dipeda merekah sereta rimpak ba mayuh endur.
Peranak menua nya ke dikanggau nama Mat, madah pengkalan nya majak rusak pengudah pengawa ngangkut batu dikereja nengah pengekalan nya kira dua tiga bulan ke udah.
“Kenyau ari nya, pengkalan besai ke endang suah dikena peranak Kampung Selalang nya nyau majak rusak, tang nyentuk ke sehari tu nadai piak betanggungjawap datai ngabas endur ngemanahka sereta ngemataka pengawa lori ke ngangkut batu nengah pengkalan nya.
“Tambah mega, tiap kali pengawa lori ngangkut batu ba endur nya ngujungka pengkalan simen nya majak rusak,” ku iya lebuh berandau enggau media, kemari.
Pengkalan besai nya bepalan ba belakang pasar mit Kampung Selalang lalu kira lebih kurang 35 kilometer penyauh ari mengeri Sarikei.
Iya ti sinu ngenang nasip bala pengguna pengkalan nya ngarapka piak betanggungjawap ulih mutarka penanggul tu. Ku iya, pengkalan mega suah dikena bala nembiak nurun sekula enggau orang berikan ninting hari.
Nangkan ke nya, seiku agi peranak menua nya minta pengkalan nya digaga enggau lengkas laban ulih ngeruga pengelikun pengguna. “Anang nganti udah dituntung penusah baru deka ngemanahka perengka rama tu,” ku iya.